Talento: PPP

ADVANCE Happy New Year sa tanang tigpanubay sa SuperB!!!

Kumusta ang pagpanikaysikay niadtong Pasko, nabusog ba kamo o sobra kaayong nahago?

Ana gayud na no kay tungod lamian ang atong gustong saluhan sa Noche Buena, wala-tuo ang preparasyon sa mga nagkadaiyang pagkaon ang atong ibutang sa lamesa. Piktyuran dayon human sa pag-ampo unya habhab to the max na, ha-ha!!!

Sa dili mahimutang tungod ningbug-at na ilang timbang, hinayhinay lang og “chubabam” (kaon god) kay lisod na nga ang kalipay mahulog sa kamatay- ayayyy!!! Ang mga kolesterol, uric acid ug uban pang kemikal nga makadaut sa kalawasan, anaa sa mga lamiang pagkaon sama sa papaitan, balbacua, humba, litson ug uban pa, igsuon.

Bitaw, una ningbagting ang orasan sa alas dose aron magsaulog tag Pasko, nagpanubay sa misa sa telebisyon ang pamilya nako. Matod pa sa mamumulong, nindot nga atong gaksun ang tulo. Yes, “3” ka letrang “P” sa atong pagkinabuhi.

Kung sa mga prisipyo ug laraw sa “marketing,” mahinungdanon ang letrang “P” tungod nagarepresenta kini sa “Product, Price, Placement, Packaging, Promotion” ug uban pa. Basehan kini nila aron mokita og dako ang kompanya pinaagi sa daghang produkto nga ilang mabaligya.

Sa espirituwal nga bahin sa kinabuhi, ang Pari nagkanayon nga sa adlaw-adlaw nga hagit sa kinabuhi (kanang makapanipis sa atong buhok ug makapangatol sa atong hubon bisan walay uban o kaspa, igsuon), importante nga gakson nato ang tulo ka “P.” Ang Una kay “Prayer” gisundan sa “Patience” ug ang ulahi mao ang “Perseverance.”

Dili ba lami ipamalikas o i-wild kung tulo ka oras na kang natrapik sa kadalanan. Kanang wala ka gisipot sa imong kasabot unya wala man lang nagpahibalo nga dili diay siya madayon og tagbo nimo, lamia ipabarang no?

Katong hinungdan nga naprenda imong balay, nabaligya ang pedicab o gialimang baboy kay lagi imong kwarta motriple, lami seguro silang sindihan samtamg buhi pa!!

Oooops, wala ko nag-apil anang money investment schemes ha. Klarohon lang nako apan apil ko sa mga nalagot tungod sa pangbiktima nila sa mga kaigsuonan natong nangandoy pod nga makalingkawas sa kapobrehon busa nailad, igsuon. Wa koy labot atong mga hakug nga bisan kwartahan na, gusto sigeg padaku sa ilang sapi bisan walay pagkugi, “mirisi!”

Wala ko nangaway... Nagpahungaw ra, ha-ha!! Sa “prayer” mahimong malinawon ang atong kasingkasing kay nasayod kita nga bisan wala kita’y mabuhat sa maut nga sitwasyon nga atong ginaatubang, anaa ang Dios Amahan.

Siya’y maghatag natog kaalam ug pamaagi aron makapadayon kita sa atong mga kinabuhi. Ang atong pagyawyaw dili makabag-o sa sitwasyon, busa i-ampo nalang nato, igsuon kay ang Diyos sa Iyang kaluoy mowagtang sa atong mga kahigwaus ug kakapoy.

“Patience” o “pasensya” ang ikaduha. Matod pa, “pildi ang maglagot” busa bisan unsay mosurang-surang sa atoa, maayo gayud kung kita kahibalo mopasensya. Tsk, tsk! Gamay ra kaayo kog balon nga pasensya everyday mao dali ko maugtas sa bisan unsang matang nga dili na unta daginuton.

Ang ulahi mao ang “persevere” o “paglahutay.” Lisod man gayod mabuhi ning kalibotana kung wala kita’y mga sul-ob nga hinagiban nga moproteksyon kanato batok sa mga bintahuso, mangingilad o dautang mga tawo, apan anaay Ginoo nga nagapanalipod nato.

Lisod ang kinabuhi apan makaya nato kini tungod grasyoso ang Ginoo nato. Sa kadaghan natong mga kalapasan, impyerno unta atong padulngan, apan mahimo na hinuon kitang tigdawat sa gasa sa kaluwasan ug uban pang mga panalangin tungod sa pagkabuhi ni Hesu Kristo.

Dili ba mas nindot magpadayon sa atong mga kinabuhi bisan puno sa hagit kung atong nasayran nga ang Diyos Amahan dili kita pasagdan?

Busa dili kita magmaluya dinhi sa kalibotan, higala, kay mas daghan pa kita og atubangon sa tuig 2020, igsuon. By faith, kita malipayong magpanon sa 2020 hangtud sa kahangturan, AMEN!