TALANDUGON ang kahimtang sa usa ka traysikol drayber human pusila sa iyang kanhi silingan gumikan sa kasaba ug kayabag sa tingog niini nga nagkanta sa videokehan, adlaw sa Pasko, Miyerkules, Disyembre 25, sa Barangay Tigatto, Buhangin District, Davao City.
Ang biktima mao si Ricardo (bansagon gitago), 29-anyos, minyo, ug residente sa maong barangay samtang ang suspek nailhang si Raffy Mamarinta, 33-anyos, nagpuyo sa Kilometro 11, Purok 10, Barangay Waan, Buhangin District.
Subay sa inisyal nga imbestigasyon sa Buhangin Police Station nga nagtagay og ilimnong makahubog ang biktima uban sa iyang mga higala samtang nagkanta-kanta sa usa ka videokehan sa maong dapit.
Nasayran nga kalit miabot ang suspek kinsa armado og wala matino nga kalibre sa armas, dayon gipusil ang biktima tumong sa ulo dayon nahagba ug gidala sa ospital samtang ang suspek daling misibat.
Dugang nasayran nga una ang pagpamusil, ang biktima maoy mikanta sa iyang napili nga awit dihang giingon nga gisamokan ang suspek sa tingog niini.
Nasayran sab nga duna na’y kanhi personal nga dumot ang biktima ug ang suspek diin sa videokehan lang miinit dihang nahibal-an sa suspek nga nagtagay ug mikanta sa videokehan ang biktima.
Gihimo na ang hot pursuit operation batok sa suspek, samtang ang biktima talandugon sud sa Southern Philippines Medical Center.