DUHA ka managtiayong piniriso gikasal sulod sa Mandaue City Jail kagahapon, Biyernes, Disyembre 27, 2019.
Ang mga managtiayon daan nang naglive-in sa wa pa sila napriso. Karon gitagaan sila ni Mayor Jonas Cortes og katigayonan nga magminyo pinaagi sa mass wedding program sa Mandaue City Jail.
Sila ni Hernante, 40, ug si Amanda, 35, (dili tinuod nga mga pangalan), 15 na ka tuig nga nagpuyo ug adunay pito ka mga anak apan namatay ang duha.
Nagkagusto si Amanda kang Hernante tungod sa ka-sweet niini ug kay buotan. Si Hernante nagkagusto kang Amanda tungod kay maminaw sa tambag niya. Si Hernante napriso sulod sa pito na ka tuig; si Amanda, napriso usa ka tuig ug lima ka buwan.
Ang laing magtiayon nga si Junnel, 35 ug si Ashley, 25, (dili tinuod nga mga pangalan), dugay nang nagpuyo sa wala pa kini mapriso niadtong 2017 sa kasong paglambigit sa ilegal nga drugas.
Ang duha aduna nay tulo ka anak nga nagpangidaron og syete anyos, kwatro anyos ug dos anyos.
Na-emosyonal si Junnel ug Ashley sa ilang kasal tungod dugay na kini nilang plano sa wala pa sila nadakpan.
Sa kamingaw sa mga magtiayon tungod dili kini tugotan sa pagbisita sa ilang pares bisan tapad lang kini og dorm, hinungdan nga nihangyo si Ashley nga tagaan sila og katigayonan nga makabisita sa usag-usa.
Matod ni JSupt. Gil Inopia, warden sa male dormitory, nga karong nakasal na ang mga magtiayon mamahimo na silang makagamit sa conjugal visit pinaagi sa usa ka court order.
Matod ni J/Insp. Pauline Bajar-Omega, warden sa female dormitory, adunay sobra sa 10 ka mga pares sa prisohan ang giawhag sab nila nga magpakasal apan wala ni sila makakompleto sa requirements alang sa ilang programa.
Sa iyang mensahe, nagkanayon si Mayor Cortes nga nindot panaminan ang duha ka magtiayon nga bisan man sa kahimtang nila sa prisohan wala gihapon kini ni-give up sa ilang panaghigugmaay ug gipadayon ang ilang panaad sa usag-usa.
“Ako silang gipahinumdom nga hinaot pa unta nga they will be there for each other for the best and worst of time,” matod ni Cortes.