MOABOT sa 9,000 ka mga bata sa mainland ug isla sa Olango sa Lapu-Lapu City ang nakapahimulos sa mga Christmas party.
Ang parties gidalit sa kagamhanan sa Lapu-Lapu, Sangguniang Kabataan (SK) Federation ug Local Youth Development Office.
Ang “Pasko sa Kabataan 2019” gipahigayon sa Olango niadtong Disyembre 22 samtang sa mainland niadtong Disyembre 26-27.
Gawas sa kalingawan ug duwaanan, gipang-apod-aporan usab ang mga bata og packed meals sa Jollibee.
Adunay raffle alang sa tanan diin adunay mga midaog og biseklita, skateboard, scooter ug mga bola sa basketball, volleyball ug soccer.
Matod ni Laika Tampus, SK Federation president, nikuha sila og moabot sa 300 ka mga bata sa 30 ka barangay.
Ang kadto lang mga kabus nga mga bata ang gitagaan og prayoridad nga makatambong sa party.
Ang Barangay Mayor’s Office (BMO) ug ang SK maoy nitudlo niining mga bata, matod ni Tampus.
Ang kalihukan mao na usab ang unang tuig nga nangunay ang SK sa pagdalit og kalingawan sa kabataan ning panahon sa pasko.
“Naa mi gi-hire nga performers, magicians, acrobats and performers nga talent gyud kanang mokanta ug mosayaw. Upon exit, nila hatagaan gihapon sila og chance nga makakuha og popcorn, cotton candies, ice cream and tempura. Naa pud mi loot bags nga candies ang sulod,” matod ni Tampus. (GCM)