GIKINAHANGLAN na unya sa molukat og student permit ang driving school certificate.
Apan giklaro ni Land Transportation Office (LTO) 7 Regional Director Victor Caindec nga wa pa kini nila ipatuman.
Wa pa usay abiso ang ilang ulohang buhatan kon kanus-a kini sugdan.
Giklaro kini ni Caindec taliwa sa posibleng pagpakatap og fake news nga kagahapon, Disyembre 27, ang katapusang adlaw sa pagkuha og student permit nga way driving certificate gikan sa driving school.
Reklamo
Si Caindec daling niaksyon sa reklamo nga dunay giingon nga pagpamaligya og priority numbers sa usa ka licensing site sa LTO 7.
Ang Superbalita Cebu nakadawat of reklamo nga adunay fixers sa J Center Mall nga licensing center diin naninda og priority numbers nga nagkantidad og P300.
Sa reklamo nga nadawat sa Superbalita Cebu pinaagi sa Facebook page niini, inay P317.63 ang bayad sa pagproseso sa pagkuha og student permit, gibaligya kini sa mga fixer og P640 o dugang P322.37 sa orihinal nga bayad lang sa pagkuha sa permit.
Si Caindec miklaro nga kining fixers ang nanglimbong sa publiko pinaagi sa pagbaligya sa priority numbers sa pagkuha og permit nga “only the fixers are misrepresenting the priority numbers as for sale.”
“The guard issues a number only to those going inside, and they need to leave their ID first to make sure nga dili proxy. I asked the chief of office to sign each of the form to write again their priority number para dili mabaligya. I also instructed the chief of admin to send a backup team,” si Caindec sa iyang text message ning mantalaan.
Nagpadala usab og pulis ang LTO sa licensing center kagahapon aron madakpan ang fixers.
Duda ni Caindec nga daghan ang nituo sa fake news nga sa pag-isyu og student permit last day na kagahapon, Biyernes, Disyembre 27, nga di magkinahanglan og driving school certificate.
Dugang niya nga wa pay petsa ang bag-ong polisiya ingon man wa pay abiso ang national office nila. (HBL)