DI NA kinahanglan pa nga ipaubos ang tibuok lalawigan sa Sugbo sa state of calamity kay sakto na ang pagdeklarar sa duha ka mga lungsod nga labihang naapektohan sa bagyong Ursula niadtong Pasko.
Kini maoy giluwatan ni Gobernador Gwendolyn Garcia atol sa iyang ocular inspection o assessment sa duha ka mga lungsod, Disyembre 27, 2019.
“The towns of Medellin and Daanbantayan have themselves declared state of calamaity that already allows us to access calamity funds”, matod ni Garcia.
Kapin sa 6,000 ka mga balay sa duha ka mga lungsod ang hingpit nga nangaguba sa bagyo.
Sa duha ka mga lungsod, ang nagrabehan mao ang Daanbantayan. Matod ni Daanbantayan Mayor Sun Shimura nga labing minos 6,000 ka mga balay sa iyang lungsod hingpit nga naguba.
Mokabat usab sa 9,765 ang nakaangkon og kadaut.
Sa Medellin, mokabat sa 98 ka balay ang hingpit nga naguba samtang 2,542 ang nakaangkon og kadaut.
Makadaut
Si Garcia nipasabot nga di maayo nga ang tibuok lalawigan ipaubos sa state of calamity kay daghang mga dapit way kadaut. Makaapekto usab kini sa turismo.
“Let it be i-confine sa na nato. We might be sending the wrong signal also to the rest of the country and internationally. It could affect our tourism as well,” matod ni Garcia.
Atol sa iyang pagbisita ug pakigtagbo sa mga opisyal sa barangay sa duha ka mga lungsod, matod niya nga iyang nakita ang labing gikinahanglan sa mga barangay.
Gipasalig ni Garcia nga may mapaabot ang duha ka lungsod nga ayuda gikan sa Probinsya, apan wa pa hinuon mibutyag ang gobernador sa kantidad niini.
Gipahibaw ni Shimura nga may P3.9 milyones nga available quick response fund ang lungsod nga magamit sa pagtabang sa mga apektadong residente.
Samtang ang lungsod sa Medellin duna usay P2.530 milyones nga QRF nga magamit.
Cebu City motabang
Cebu City Government mohatag og ayuda sa libuan ka mga pamilya nga apektado sa bagyong Ursula sa lungsod sa Medellin ug Daanbantayan sa northern Cebu.
Si Mayor Edgardo Labella nagkanayon nga karong buntag, Sabado, Disyembre 28, kauban ang mga kawani sa Department of Social Welfare amd Services (DSWS), LDRRMO ug Office of the Mayor mohatod sa relief goods.
Si Dr. Jeffrey Ibones, pangulo sa DSWS, nibutyag nga lakip sa ayuda nga dala ni Labella mao ang bottled water, bugas, housing materials, trapal ug uban pa.
Ang relief goods maoy nag-unang panginahanglan subay usab sa rekomendasyon sa Disaster Team nga gipangulohan ni Harold Alcontin nga iyang gipadala sa maong mga lungsod.
Rehiyon
Sa Central Visayas, adunay dul-an sa 13, 150 ka mga pamilya ug 65,344 ka mga indibidwal sa 14 ka mga LGU ang apektado sa bagyong Ursula nga nagkuso-kuso sa Rehiyon 7.
Ang 14 ka mga LGUs mao ang siyudad sa Bogo, Poro sa Camotes, Daanbantayan, San Francisco, Madridejos, Sogod, Medellin, Carmen, Siyudad sa Danao, Pilar, Tudela, San Remegio, Bantayan ug Santa Fe.
Sigon ni Allen Cabaron, chief sa operations sa Office of Civil Defense, nga kasagaran sa mga apektado nga mga indibidwal nakauli na sa ilang tagsa-tagsa ka balay niadtong Disyembre 25, 2019.
Dungag usab niya nga wa nataho nga adunay mga mga naangol o mga kadaot sa Negros Oriental bisan kon lima ka mga syudad nga naglangkob sa Canlaon, Guihulngan, Jimalalud, La Libertad, ug Vallehermoso nangaigo sa bagyo.
Wa usay nasuta nga kadaot sa Bohol ug Siquijor.
Panagat
Moabot sa P14.9 milyones nga kantidad sa mga panginabuhian sa manangat sa Northern Cebu ang naapektohan human sa bagyo.
Ang Bureau of Fisheries and Aquatic Resources (BFAR) 7 nibutyag nga niabot sa 255 ka mga mananagat ang apektado.
Base sa pasiunang damage report sa ahensiya, usa sa naguba kini ilang 800 square meters nga multi-species hatchery sa Kawit, Medellin diin nagkantidad og P1.2 milyones.