Sugilanon: Bugti sa walay pagpakabana

TAN-AWA sila, Pedoy,” matod ni Derio nga nanakla ug nagpanglingo samtang ang ilang mga silingan gianam-anam pagluba sa wala-hiilhing mga tawo, “Naratsada silang mahilabtanon. Nagbuy-od silang tanan sa yuta.”

Misanong usab niini si Pedoy. “Bitaw, Derio. Kagahi nilag ulo. Di mamati kon atong sultihan. Masuko pa kon nganong wala kita manginlabot.”

“Manginlabot sa ilang kabuang? Ingna hinuon nga mahilabtanon sila. Mao nga natipi sila,” ni Derio.

Nasayod silang managsilingan nga ang ilang barangay tsirman ug uban pang mga opisyal maoy nagpaluyo sa gidiling mga drugas sa ilang dapit. Nagpakahilom lang sila. ilabi na nga ang mga barangay opisyal maghatagan kanilag mga hinabang ilabi na sa sapi. Ang gobyerno way dakong sapi nga ikahinabang niadtong na-ospital ug nagkinahanglan og operasyon. Apan ang mga opisyal sa ilang barangay maoy moabaga ug mogasto sa tanan nilang mga panginahanglan. Kanunay may kalingawan sa ilang barangay kay morag magpista matag semana. Kaon ug inom didto ug kaon ug inom diri.

Kompleto ang ilang barangay. May mga multi-cab ug uban pang mga sakyanan nga mohatod sa ilang mga anak sa eskuylahan. May libre pang mga bag ug uban pang kagamitan sa pagtuon sa ilang eskuylahan.

Apan usa niana ka buntag nga nahigmata sila si Pedoy ug Derio nga nagpangita sa ilang mga anak nga mga dalaga. Mousa na ka semana nga wala na igkita ang ilang mga anak nga gikan sa gitunghaan nilang eskuylahan ug wala na mahibalik sa ilang pinuy-anan. Ang ilang mga asawa nagkurog na sa tumang kahadlok ug kabalisa. Way puas ang mga pagbakho sa ilang mga kadugo.

Human sa usa ka buwan nga pagpinaabot, may nadawat silang mga taho sa radyo ug telebisyon. May mga batan-ong babaye nga nakaplagan sa daplin sa tagong dalan sa laing barangay. Ingon sa kalabera na ang mga patay, apan may mga kuwintas ug singsing ug ingon man sa mga identification card (ID) nga nagpaila ug nagmatuod kon kinsa sila.

Wala makatuo ang mga banay nila ni Pedoy ug Derio nga ang nakaplagang mga patay mao ang nawala nilang mga anak.

Sa awtopsiya nga gihimo sa kapulisan, nahibaw-an nila ni Pedoy ug Derio nga gilugos ug gipatay ang ilang mga anak. Gituohan nga gihllabtan ang ilang mga anak sa mga adis-adis. Ug ang dili nila madawat mao ang kamatuoran nga gihikyad sa kapulisan nga ang ilang mga anak – mga adis-adis usab. Nagasukmat na sila si Pedoy ug Derio sa ilang kaugalingon kon hain na man ang ilang pagpakabana? Gitulisok sila sa ilang kaugalingong mga tanlag. (Katapusan)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph