BAG-O ra nahuman ang Pasko apan segurado ko nga hangtod karon ang atong lawas busog ug puno pa sa mga kinaong lechon, spaghetti, salad, ug sari-saring mga tam-is nga cakes, cookies og uban pa.

Pila ka tulog na lang, mo-abot na sab ang Bag-ong Tuig sundan sa Sinulog. Pasabot nga kaon na sab nga wa diri, wa didto ug seguradong mo burot na sab atong mga tiyan og kina-on. Unsa may indikasyon kon ang lawas nasubrahan na sa kamay?

Tinuod ang kamay maghatag og tam-is nga lasa sa pagkaon apan kon kini masubrahan, magdala sab kini og dakong kadaot sa panlawas.

Kon kini mahitabo, imong mamatikdan kining mosunod nga balatian:

Kakuwang sa enerhiya ug tumang kakapoy. Kining sugar kun kamay ug carbohydrates maoy mosuyop sa enerhiya sa lawas maong bation og tumang kakapoy bisag bag-o pa o gikan mipahuway.

Epekto sa panit ug tiil. Ang pagpang-gawas sa bugas-bugas sa nawong, eczema o rosacea ug pagpanghupong sa tiil resulta sab sa subrang pagkaon og tam-is kay ang kamay duna may sangkap nga makapahubag o burot sa lawas.

Sunod kining pagpananambok o pagta-as sa timbang. Obserbahi kay human sa mga dagkong kasaulugan, seguradong ang imong sinena di na masirado o ba kaha mo dako ang bilbil kay kining kamay wa may protina ug fiber.

Balik-balik nga sip-on ug hilanat. Kon ikaw dali nga matakdan sa sip-on o flu, posibling nanghinubra imong kamay sa lawas. Ngano? Kining kamay maka pamenus sa resistensya sa pagbatok ining mga sakita.

Sayong makapatiguwang. Ang hilig og tam-is mas daling matiguwang kaysa hinab-ang kay makadaot man sa protein nga naa sa panit, collagen ug elastin nga maoy maka-ingon sa pagpangunot sa panit ug sayong pagkatiguwang.

Kon magsegi og saka ang lebel sa asukal sa mga kinaong mga tam-is sama sa softdrinks, ang taste buds sa baba magpangita sab og mas tam-nga maoy mo hinay-hinayan og daot sa ubang parte sa lawas unya delikadong ma diabetic o mopadulong sa pagkadaot sa ubang importanting parte sa lawas.