DAVAO DEL SUR -- Nagsugod na pagdagsa ang mga pasaherong namauli sa nagkadaiyang dapit sa lalawigan aron magsaulog sa Bag-ong Tuig 2020.
Taas nga pahulay ang masinati sa mga bakasyonista human katapusang adlaw na sa mga opisina sa gobyerno ug ubang pribadong kompanya niadtong Biyernes, Disyembre 27.
Usa ka regular holiday ang adlaw’ng Lunes nga pagsaulog sa Rizal Day ug nadugang nga special non-working holiday karong Martes, Disyembre 31, New Year’s Eve.
Gumikan niini, nakauli na sa dakbayan sa Digos si April Banga, 34-anyos, kinsa nanarbaho didto sa Tagum City sa Davao del Norte.
Dako ang kalipay niini nga taas ang bakasyon kay makauban niya ang iyang pamilya sa pagsugat sa Bag-ong Tuig human wa siya nakauli niadtong adlaw sa Pasko.
Seguridad sa mga pasahero
Gidugangan na sab sa Davao del Sur Police Provincial Office (DSPPO) ang ilang pwersa nga magbantay sa mga pampublikong terminal human gilauman ang mas maghuot pa ang mga pasahero karong adlawa hangtud na sa adlaw’ng Martes nga katapusang adlaw sa tuig 2019.
Ang mga sakop sa Provincial Mobile Force Battalion gi-deploy sab sa aron mag-checkpoint sa mga entradang bahin sa lalawigan.
Subay sa mando ni Police Colonel Alberto Lupaz, officer-in-charge sa DSPPO, gikinahanglan nga magpatrolya ang kapolisan apil ang tanang hepe aron bantayan ang mga dapit diin nagpunsisok ang bagang duot sa katawhan.
Giawhag sab ni Lupaz ang publiko nga mohatag sa ilang kooperasyon ngadto kanila alang sa hapsay ug malinawong pagsugat sa tuig 2020.