PIKIT, North Cotabato -- Narekober sa mga sundalo ang mga dagkong klase sa improvised explosive device (IED) ug mga kagamitan sa paggama sa bomba sa mga rebelde alas 3 sa hapon niadtong adlaw nga Biyernes, Disyembre 27, sa probinsiya sa Cotabato.
Sa taho gikan sa 602nd Brigade nga nailog sa hiniusang puwersa sa 7th Infantry Battalion (IB) Philippine Army, 34th IB, 62nd Division Reconnaissance Company, Explosive Ordnance Disposal (EOD) team ug Pikit PNP ang himoanan sa IEDs sa Bangsamoro Islamic Freedom Fighters (BIFF) sa Sitio Blah, Barangay Manaulanan, Pikit, North Cotabato.
Gitago ang mga bomba sulod sa usa ka balay nga gi-abandona sa mga rebelde ug ilang gibiyaan atol sa ilang pag-ipsot.
Narekober sa militar ang napulo ka plastic container, 1 liter flash powder, improvised electric blasting cap, firing Wire (20 meters) og usa ka battery (12 volts).
Bag-o nasulod sa mga sundalo ang himoanan sa bomba, nakadawat sila og impormasyon sa mga sibilyan sa presensiya sa BIFF hinungdan nga nagpahigayon sila og law enforcement operation.
Dako sab ang pagtuo ni Bregadier General Roberto Capulong, 602nd Brigade Commander, nga ang grupo sa BIFF nga gilutos sa militar sa Barangay Manaulanan, Pikit, Cotabato maoy gitumbok nga suspek sa pagpamomba sa Libungan Cotabato ug Cotabato City.
Nanawagan usab si Lieutenant Colonel Niel Roldan, 7th IB Commander, sa katawhan nga igmaton ang ilang kaugalingon ug itaho dayon sa awtoridad ang mga tawo nga lahi og panglihok nga mosulod sa ilang komunidad. (Edgar Fuerzas)