DAVAO DE ORO -- Daghan karon mga Orohanon ang igo na lamang sa paghandom sa kaniadtong mga damgo ug pangandoy sa panahong buhi pa ang paglaom sa grasyang dala sa mga nahanaw’ng mga money investment schemes, labi na ang binulang grasya nga madawat kaniadto gikan sa Kapa Community Ministry International Inc. (Kapa).
Si Alexis (nagpatago sa bansagon), usa ka pedicab driver sa lungsod sa Compostela, nagbutyag nga kung wa pa mabulilyaso ang Regin Marketing, usa sa mga investment scheme kaniadto, hayan nakapalit na unta siya og four-wheel nga sakyanan ug nadala niya karong Pasko ngadto sa Disneyland ang iyang mga anak.
“Sa P5,000 nga among gibutang sa Regin, dako na unta kaayo kadto nga kuwartaha karong Pasko. Milyonaryo na unta mi sa akong pamilya ug wa na unta ko namasahero karon ning akong pedicab,” ingon ni Alexis.
Gisulti usab sa usa ka negosyante sa lungsod sa Nabunturan nga tungod sa napakyas nga mga investment, padayon siyang nagbayad sa dakong kantidad nga iyang na-utang sa bangko nga iyang gi-invest sa Ever Arm.
“Kining akong utang sa bangko, nga maoy hinungdan sa kanunay namong lalis ni misis, dugay na unta ni naimpas ug milyonaryo na unta ko ning paskoha,” saysay ni Maribel (nagpatago sab sa bansagon).
Matud pa nga sa kantidad nga P180,000 nga gi-invest sa Ever Arm, dili moubos sa lima o unom ka milyon ka pesos ang maangkon unta sa maong negosyante ning bulan sa Disyembre nga diin plano niya kaniadto nga maghikay alang sa tibuok barangay atol sa Pasko, mag-ihaw og tulo ka baka ug maglitson og napulo ka baboy.
Apan, ang maong mga plano, igo na lamang sa paghandom ug wa na’y purohan nga matuman pa suma sa mga nagpadayag sa ilang kasakit sa dughan.
Sama sa ubang mga miyembro sa Kapa nga nahisakop sa Montevista branch nga sa sinugdanan malaumon sa hingpit nga pagbalik sa operasyon sa Kapa ug naghandom nga adunay blessing nga madawat atol sa Pasko.
Apan, kaguol ug kapakyas ang gibati dihang sa nagkaduol ang kapaskuhan usa ka text message ang nadawat mga miyembro gikan sa mga nagdumala sa giingong bag-ong Kapa nga nagsulti nga ang tanang “donation” gikan sa bulan sa Enero hangtud sa Hunyo 7, 2019 igo na lamang i-uli ug wa na’y interest, apan karon pang bulan sa Marso tuig 2020 kini ibalik ngadto sa mga miyembro.
Daghang mga nagpatigayon partikular sa lungsod sa Compostela ang miangkon nga mingaw gayod ang Pasko karong tuiga sanglit gawas sa kapakyasan nga nasinati sa ubay-ubay’ng katawhan labihan pa kabarato ang palit sa saging nga maoy nag-unang produkto sa lungsod sa Compostela.
“Kaniadto, per box nga palit sa saging moabot og P250 ngadto sa P350. Apan karon, tag P60 nalang ang box. Kinsa ba’y malipay ana?” saysay sa usa ka grower sa sagingan.
Una niini, gipasirad-an ni Pangulong Rodrigo Duterte ang Kapa niadtong Hunyo 8, 2019 ug nalakip pagsirado ang giingong lain pang 30 ka mga money investment company nga naglihok sa siyudad sa Tagum.
Ang lakang sa pangulo giingong miresulta sa pagkahugno sa mga damgo ug pangandoy sa kapin milyon ka mga Pilipino nga naglaum nga mahaw-as sa kalisod ug maangkon ang kaharuhay sa kinabuhi sa tabang sa gilaumang mga money investment schemes.