GILANGKAT sa Golden State Warriors ang ilang ikaupat nga sunodsunod nga kadaugan pinaagi sa pagpukan sa Phoenix Suns, 106-95, kagahapon sa National Basketball Association (NBA).
Niini, mipatapsing og pangumediya si coach Steve Kerr nga ang Warriors dili na kapugngan pa. “You can only hope to contain us right now,” pasumbingay ni Kerr.
Ang Golden State nga nakalangkat og tulo ka titulo sulod sa lima ka tuig, gihulagway karon nga maoy pinakaubos nga team sa Western Conference human tagsatagsang gihasol og mga injuries ang ilang mga star players.
Si D’Angelo Russel mipuga og 31 puntos ug unom ka assists aron pangulohan ang Warriors nga mahaw-as sa dihang gibiyaan na kini og 10 puntos sa fourth quarter.
Midugang og 16 si Damion Lee, 13 ni Alec Burks diin siyam niini diha na usab sa fourth quarter ug 11 puntos ug pito ka rebounds ang natampo sa beteranong si Draymond Green.
“I just think we’ve got a little momentum and our guys are feeling it,” dugang ni Kerr. “Just stayed with it. At this point we believe we can win down the stretch. We’ve definitely taken a step forward in that regard.”
Ang Warriors nga nipakaging sa inilog nga Houston Rockets niadtong Pasko, perming naggukod sa Suns ug gibiyaan kini sa katapusang siete minutos sa regulation period, 86-76.
Gisugdan ni Russell pagduslit ang rally sa iyang free throws ug gisundan dayon kini sa three-point play nga maoy nagbuka sa ilang dalan paingon sa kadaugan.
Sa laing duwa, ang Boston Celtics midominar sa Cleveland Cavaliers, 129-117; gipalanogan sa Thunder ang Hornetts, 104-102 ug gipakuratan usab sa Magic ang Sixers, 98-97.
Yanong gipatugdong sa Milwaukee Bucks ang Atlanta Hawks ug gipaigking sa Miami Heat ang Indiana Pacers, 113-112. (JBM)