KULBAHINAM nga aksiyon ang gipaabot nga masaksihan ugmang sa gabii, Disyembre 30, 2019, sa dihang magtigi sa ilang kalantip ang mga eskperiyensiyadong mixed martial arts fighter nga sila si Joseph Mercado ug Edmund Vergara sa “Cebu Fighting Championship-The Wait” sa Sports Complex sa barangay Buanoy, lungsod sa Balamban, Cebu.
“Nindot gyud ning awaya kay pulos talented ning duha. Tan-aw nako duna gyuy ma-knockout ani. Away ni sa duha ka beteranong fighters,” matod ni Master Benigno “Ekin” Caniga, ang founder sa Yaw-Yan Ardigma kinsa usa usab sa mga promoter.
Si Mercado, nga taga Coron, Palawan apan ubos sa paggiya sa Yaw-Yan Ardigma, nailang may igo nang kasinatian sa boxing, Muay Thai ug MMA.
“Nagsimula ako bilang amateur boxer sa edad na 12, at saka nag professional fighter sa mixed martial arts sa 2010,” matod ni Mercado kinsa adunay record nga 20-5. “Target ko talaga na lumaban sa ONE championship, kaya kailangan kong panalo.”
Si Vergara, sa iyang bahin, gihulagway usab nga pioneering MMA fighter sa Cebu, sa dihang gisugdan ni Master Ekin pagpaila ang maong natad sa paugnat sa kusog sa tuig 2000s.
“Sakto ko sa kondisyon. Di ko magpakauwaw ug ipakita nako ang impresibong performance ning awaya,” matod sa sakop sa Black Panther MMA.
Gipaabot nga modugang sa kaikag sa maong promotion mao ang pagsaka og balik sa ring ni Renan “Flash” Noblefranca kinsa mosuway sa katakos batok ni Tonix Borres sa JB Dream Fitness Gym.
Human makaangkon sa kapildihan sa iyang pagbalik sa niaging buwan, saad ni Noblefranca nga makabawi.
“Taodtaod gyud nga wa ta kaaway, mao nga mediyo natay-an ta’g gamay. Pero makabawi gyud ta ani,” matod ni Noblefranca kinsa usa sa mga gikahadlokang striker sa Cebu sa wala pa temporaryong miundang.
Sayod si Borres sa kalidad ni Noblefranca apan iya kining gikonsiderar nga dakong hagit sa iyang career.
“Lig-on gyud ning kontraha. Mao ni usa sa pagtesting sa akong abilidad kon asa nako nga level,” padayag ni Borres.
Ang ubang parisan nga mopakita og aksyon sa unang mixed martial arts promotion sa Balamban mao sila si Nino Rio Saoy sa Mactan Combat Sports batok ni Mark Antholene Balaba sa Gan Suo Do Pitbull sa Iligan sa co-main event fight.
Sa Muay Thai, si Edgar Caburnay Jr. makigsangka ni Jether Pio Jr., Ken Caburnay makigpinatiray ni Mark Vincent Dono ug mosakbang usab si Michael Rebayos batok Lourence Benduito.
Sa MMA undercard, mopakita usab sa ilang abilidad si Albert Garnica batok ni Ariel Regodon, Edgar Huete batok Jayson Cabradilla, Denmark Comaingking batok Emmanuel Aron Plaza, Kim Bisbal makigsinukliay sa kumo batok ni Isaac Torres.
Magtakos usab sila si Ruben Amoin ug Bethoven Quijano, Harold Tabalino batok Mark Otida, Christian Tabunag batok Alsharidz Damlani ug Josh Ybañez mosakbang ni Laurence Lee Ramirez.
Aduna usay panagtigi sa arnis nga giisip nga usa sa mga kalihukan sa anibersaryo sa Lapunti Arnis de Abanico Balamban Chapter ni Grandmaster Edgar Caburnay. (EKA)