Sugilanon: Forever love sa Sam-ang

ANIA ako karon sulod sa karaang sam-ang sa among dakbayan. Nalibot ko na ang sidlakang bahin sa naglumbayng mga nitso niini nga ania sa dibisyon sa San Mateo. Ang mga nitso may upat ka patong, sa gitas-on nga kapin sa napulo ka tiil, ug ang gilapdon ini may kapin sa unom ka metros gikan sa dakong ganghaan sa sam-ang. Nagpangita ako sa anino sa tawo nga ginganlan og Gerard.

Duha ka tuig kaming nagkaila ug nagkahigala sa Facebook ug internet.

Dugay na siyang nagahangyo kanako nga magkita kami, personalan gyud, face-to-face, kay ambot lang sa langaw,kay nagkarelasyon na kuno kami. The two of us have fallen in love, nga kami natagak sa punoan sa kamatis ug nagkahigugmaay na. Kayha?

Moduol na ako sa katloan ka tuig. Katulo na ako mapakyas sa gugma. Mao nga nahidangat ako sulod sa computer world. Pa-texting-texting, pa-talking-talking sa akongcellphone ug tablet mao na lang ang dangpanan ko. Apan ang ginikanan ug mga kadugo ko lakip na ang mga silingan ug mga higala ko pulos pahimangno sa pakigtubay ko kang Gerard. Sa mga radyo, telebisyon ug mga mantalaan, di na maihap ang giilad, gipahimudsan, gikidnap, gitulis, gilugos ug gipatay tungod sa pagpakabuang sa nakaila diha sa Facebook ug internet. Mao nga kapin na sa duha ka tuig una pa ako makahukom nga makigkita kang Gerard.Buot kuno siyang magminyo kami basta magkakita kami. Kayha?

Mao nga ania na ako karon sulod sa sam-ang, puno sa kabalaka ug kabalisa. Tiaw mo bay anhi kami magtagbo ug magkita sulod sa sam-ang! Nakaingon ako, sa Iningles pa, weird kaayo ning gikarelasyon ko sa computer world. Misteryusong tawo!

Unya sa paglibot ko ning usa ka subdiv. sa mga nitso sa sam-ang, may mibangil sa akong panan-aw. Mibarog ang pinong mga balhibo ko sa bukton. Nangurog ako dihang nabantang sa akong panan-aw ang hulagway ni Gerard nga diha sa nitso sa ikaduhang patong. Patay na diay siya! Multo ba diay ang akong gikahinabi sa Facebook ug internet?

Kakuyapon na ako sa tumang kahadlok ug kalisang. Apan nabati kong may mikatawa ug miagik-ik sa akong luyo. Ug sa paglingi ko, nakita ko si Gerard nga midali pagduol kanako.Nagmulto gayud siya ug nakuyapan ko.

Wala na ako mahibawo kon unsay nahitabo kanako sa mga gutling ug mga gutlo nga nawad-an ako sa maayong panimuot. Nahigmata ako nga diha na sa mga bukton ni Gerard, gipaypayan sa iyang bagang panyo ug nagapahiyom kanako.

“Buhi ako, Marilyn,” mipatin-aw si Gerard kanako. “Kaluha ko ang anaa sa nitso. Nagpakamatay siya tungod sa kapakyasan niya sa gugma. Mao nga imatuod ko karon nga makigminyo ako kanimo. I do really love you! Di ko gustong mahisama sa akong kaluha.”

Nakahilak ako og hugot nga migakos ug mihalok kang Gerard. (Katapusan)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph