Binasi sa Sirac 3:2-6, 12-14; Salmo 128; Taga-Colosas 3:12-21; Mateo 2:13-15, 19-23
DILI lalim ning magbinalhinay og panimalay. Biyaan ang naandan ug atubangon ang kabag-ohan. Manamilit sa mga suod ug mangitag bag-ong kaila. Hakuton ang mga butang ug dad-on sa bag-ong lugar. Labaw na gyod ning banay nga napugos og biya tungod sa katalagman, kagubot, pagpanglutos, o gubat. Sumala pa sa United Nations adunay mga 20.4 ka milyon ka mga tawo nga matawag nga “refugee”. Kapin sa katunga niini gikan sa Syria, Afghanistan, ug South Sudan. Katunga sa mga refugee nagpangidaron og 18 ka tuig o mas bata pa. Bug-at kaayo ang ilang gipas-an nga problema kay pangitaon ang pagkaon, tubig, seguridad, ug kapanginabuhian. Layo ang lakwon ug daghang peligro nga giatubang.
Pinaagi sa damgo nagpakita ang anghel sa Ginoo kang Jose ug nagpasidaan kaniya sa peligro nga naghulat sa batang Jesus gikan sa kamot ni Herodes nga Dako nga nangahas nga patyon ang bata. Gipaadto sila sa Ehipto hangtod nga namatay si Herodes. Didto sa Ehipito adunay mga pundok sa mga Judio nga didto na nagpuyo. Purohan mao kini sila ang giadtoan ni Maria, Jose, ug Jesus sa dihang mga “refugee” sila didto.
Sa paagi nga wala damha ug katingalahan, si Jesus mao nay nilangkop sa nasod sa Israel sa pagawas sa Balaang Banay gikan sa Ehipto. Gituman niya ang gitagna sa propeta nga “gawas sa Ehipto gitawag ko ang akong anak”. Apan bisan sa pagbalik nila, wala lang gihapon sila kapauli sa Bethlehen tungod ni Hari Archelaus nga maoy nagdumala didto. Naliwat man god kini sa iyang amahan nga si Herodes nga Dako. Mao nga didto sila mipuyo sa Nazaret. Makita nato nga ang maong banay nag-agi og daghang mga pagsulay ug nga nag-agad kini sa giya sa Dios.
Gihisgotan ni Sirac ang mga kinaiya sa usa ka diosnong banay. Dinhi gitahod ang mga ginikanan kay makapapas kini sa sala ug ang pag-ampo sa maantigong motahod dunggon gayod sa Dios. Hatagan sila og taas nga kinabuhi. Sa ato pa, ang pagtahod sa ginikanan, pagtahod sa Dios nga maoy naghatag nila og awtoridad sa pag-umol sa ilang mga anak. Human makaplagi si Jesus didto sa templo sa Jerusalem mabasa nato nga mikuyog siya uban kang Maria ug Jose ug “nagmasinugtanon” siya kanila.
Ang han-ay sa relasyon tali sa magtiayon ug tali sa ginikanan ngadto sa anak gihisgotan sa sulat ngadto sa mga taga-Colosas. Sul-obon nila ang hiyas sa pagkamapuangoron, kaayo, pagkamapaubsanon, pailob, ug uban pa. Labaw sa tanan, isip kadugtongan sa kahingpitan, sul-obon ang gugma ug papuy-an ang pulong ni Cristo aron mobuhagay ang kinaadman ug pasalamat sa Dios.
Kining tanan nga nahisgotan ni Sirac ug sa sulat sa taga-Colosas mahitungod sa kinabuhi sa banay maoy pundasyon sa pamilya nga maoy mohatag niinig kusog taliwala sa tanang pagsulay, ilabina sa pagbinalhinay o sa kahimtang sa pagka-refugee. Diri sa Pilipinas, ilabina sa panahon sa katalagman ug kagubot, aduna kitay gitawag nga mga “internally-displaced people”. Kinahanglan silang tabangan.
Giampo na ba nato ang mga biktima sa bagyong Ursula? Naa pa ba kitay laing mahimo aron tabangan sila?