Editoryal: Tukod og evacuation center

Editorial Cartoon by John Gilbert Manantan
Editorial Cartoon by John Gilbert Manantan

INGON sa way nagtuo nga mokusog ang bagyong Ursula dihang niigo kini sa Kabisay-an ug Luzon sa bespiras ug atol sa Pasko. Gipanglangkat ang mga atop bisan sa dagkong mga estruktura. Giguba ang labing minos 6,000 ka mga balay sa northern Cebu. Wa makaeskapo ang pipila ka evacuation centers kay gilangkatan sa atop. Duna pay mga buhatan sa disaster management team nga nagusbat usab.

Ngano kaha nga naingon niani man ang nahitabo? Ang labing tataw ug klaro niani mao ang desinyo sa mga edipisyong gipatukod sa kagamhanan. Wa pa makat-on ang kagamhanan sa nangaging katalagman kon ang pagtukod og mga edispisyo ang hisgutan.

Kon ang pribadong sektor nakapadesinyo og mga balay nga typhoon ug earthquake resistant, nganong di man ang kagamhanan? Di ba lain huna-hunaon nga ang buhatan mismo sa disaster management office naguba? Lain pud tan-awon nga ang edipisyo nga gigamit nga evacuation center usa sa mga nadanyos.

Panahon na nga magtukod ang mga local government unit (LGU) og evacuation centers nga makasugakod bisan sa mga super typhoon. Kanang pasilidad nga di malangkat ang mga atop bisan sa kusog nga hangin. Kompleto sa mga kahimanan, sama sa emergency nga suga, first aid kits, dunay malutoan alang sa daghang mga bakwit, maayong tinubdan sa tubig bisan dunay brownout ug layo sa mga storm surge ug landslide.

Di baya ni imposible kay duna may mga eksperto, sama sa mga structural engineer, nga kahibawo sa pagpalig-on og estruktura. Ang nakaparat lang kay samtang nagpalig-on ang kagamhanan sa pagtubag og mga katalagman, wa maapil ang importanteng evacuation centers.

Tungod sa global warming nga nagdala og grabeng mga kausaban sa panahon, tukma na karon sa pagtukod og tinud-anay nga evacuation centers. Di saligan ang mga tunghaan ug covered court.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph