NA-RELEASE na sa Cebu City Treasurer’s Office ang mga sweldo, bonus ug cash gift sa kapin o kulang 5,000 ka mga kawani sa Cebu City Government.
Si Acting City Treasurer Monina Paires nagkanayon nga iya nang napirmahan ang tanang dokumento nga niabot sa iyang office nga naglambigit og mga payroll para sa mga empleyado.
Nalangan ang pagdawat sa mga sweldo ug bonus gumikan sa paghulip og acting city treasurer sanglit ni-expire ang kontrata ni kanhi acting City Treasurer Arlene Rentuza niadtong Disyembre 11.
Human niadto, wa nay makapirma nga opisyal sa CTO para ma-release ang kwarta ug tseke.
Ang Bureau of Local Government and Finance (BLGF) nitudlo kang Paires, kansang appointment epektibo sugod niadtong Disyembre 11, adlaw sa pagkapupos sa kontrata ni Rentuza.
Apan nadawat sa CTO ang suwat niadto pang Disyembre 16.
Ang resulta, wa makadawat sa ilang mga sweldo ang libuan ka mga kawani apil na ang bonus nga gipirmahan na ni Mayor Edgardo Labella.
Gipasabot ni Paires nga di magdungan og ka-release ang mga sweldo sa 5,000 ka mga regular ug casual nga kawani sanglit matag department ang preparasyon niini.
Iyang gipasabot nga kadtong departamento nga paspas nakaproseso sa ilang payroll, maoy una niyang napirmahan ug nagsunodsunod na ang iyang pagpirma. (PAC)