BARANGAY Duljo Fatima, Pasil ug Bulacao lakip na sa Barangay Casili, lungsod sa Consolacion ang mga lugar sa hatdanan og shabu sa drug pusher nga nasikop sa Drug Enforcement Unit sa Pardo Police Station sa Cebu City Police Office sa Sabado sa hapon, Disyembre 28, sa Barangay Bulacao, Siyudad sa Sugbo.
Ang buy-bust operation gipangulohan ni Police Major Jhon Kareen Escober, hepe sa Station 7, nga niresulta sa pagkasikop ni Martin Abellana, 25, taga Barangay Casili, Consolacion, Cebu.
Nasakmit gikan kang Abella ang 475 gramos nga shabu nga mokantidad og P3.2 milyones base sa Dangerous Drugs Board (DDB) value.
Si Abellana ang labing daghan og shabu nga gihuptan sa upat mga dinakpan sa laing mga operasyon. Pasado alas 2 sa hapon, nadakpan si Abellana sa mga operatiba sa DEU sa Pardo Police Station.
Matud pa ni Escober nga si Abellana makonsiderar nga apil sa regional high value target tungod sa nasakmit nga shabu.
Si Abellana duha ka mga semana na nilang gipanid-an.
Ang suspek napriso na kaniadto, apan mibalik sa pagpamaligya human makagawas sa prisohan.
Matod ni Escober nga maguwang nga babaye ni Abellana ang tinubdan sa shabu, apan toa na sa kaulohan nagbase.
Ang bayaw ni Abellana, bana sa iyang maguwang, naa sa Cebu City Jail gituohang maoy nanag-iya sa shabu.Karon, magkauban na silang duha.
Ang shabu kuhaon sa Barangay Duljo Fatima ug dad-on sa lungsod sa Consolacion ug didto pinuhon sa gagmay nga pinakete. Gipanghimakak ni Abellana nga iya kadtong shabu kay igo lang siya mokuha sa halin kon mohatag na ang gibinlan sa drugas.
Gawas kang Abellana, laing pang tulo ang nadakpan sa lahi nga mga buy-bust sa Regional Drug Enforcement Unit ug Regional Special Operations Group -7, pinangulohan ni PCapt.Jeoffrey Grande.
Laing shabu
Laing kapin sa P3 milyunes nga balor sa shabu ang nasakmit sa mga operatiba sa managlahi nga mga buy-bust niadtong Huwebes sa gabii.
Labing dako nga nasakmit gikan sa usa ka 15 anyos nga menor de edad nga lalaki, kinsa nakuhaan og P1.8 milyones nga balor sa shabu.
Si Nicole, taga Sityo Galile, Barangay Duljo Fatima, nadakpan sa mga operatiba sa City Intelligence Branch sa Cebu City Police Office pasado alas 9 Huwebes sa gabii.
Si PMaj. Randy Caballes, pangu sa CIB, CCPO maoy nangu sa buy-bust. (BBT)