SIYAM ka mga mamaligyaay sa Cebu City Night Market Bazaar i-ban sa pagpamaligya human napalgan nga dunay kalapasan sa mga lagda ug regulasyon sa gisabotan tali sa Siyudad sa Sugbo.
Matod ni Cebu City Legal Office Attorney Rey Gealon nga base sa ilang imbestigasyon, ilang nakita nga kini namaligya sa di awtorisadong pwesto.
Gipaabangan ug gibaligya ang ilang pwesto sa mga tawo nga wa nakarehistro nga mga mamaligyaay.
Si Cebu City Mayor Edgardo Labella nimando og imbestigasyon human siya nakadawat og mga report nga adunay mga vendor nga namaligya sa ilang mga pwesto sa night market.
Nahibaw-an usab nga ilang gibaligya ang ilang pwesto sa kantidad nga P15,000 ngadto sa P20,000 matag buwan.
Kini layo ra sa abangan sa rehistrado nga mga mamaligyaay nga aduna lay P1,200 matag buwan nga bayran nila sa City Government. Apil sa siyam ang lima ka mga vendor nga gisuspenso sa miaging semana kay gibaligya ang ilang pwesto.
Ang nahabilin nga upat mao ang nipalit sa gipangbaligya nga mga pwesto.
Dungag ni Gealon nga adunay niangkon nga ilang gibaligya ang ilang mga pwesto.
Aduna usay nisumiter og sulat sa Market Operation Division nga kini nihangyo ug nangayo og permiso nga ibaligya ang iyang pwesto.
Apan ang uban, wala nitunga ug nibalibad sa pag-adto sa Market Operations Division aron pagpatin-aw sa hitabo.
Sigon ni Gealon nga nanginahanglan sila og matinud-anon nga mga mamaligyaay aron sa molig-on ug magmalambuon ang night market sa Siyudad sa Sugbo.Kini usab ang gilauman ni Labella.
“For how can we be sure if they are honest in their dealings with the buying public whom the Mayor sought to protect, if they cannot be simply honest by themselves,” saysay niya.
Ang mga bana ug asawa sa siyam ka mga mamaligyaay apil usab sa i-ban nga mamaligya sa night market. Ang ila usab mga pwesto bawion sa Market Operations Divisions alang sa saktong disposisyon. Nagsugod ang night market sa Colon niadtong Disyembre 1, 2019.
Gitugtan ni Labella nga makabaligya sa night market ang mga vendor nga naapektuhan sa road clearing operation nga gimando sa Department of Interior and Local Government (DILG).
Gawas nga gipaapil sila sa night market, gitugtan usab silang makabaligya og balik sa Sabado ug Dominggo lang hangtod mahuman ang Sinulog.