GIKALIPAY sa Police Regional Office sa Northern Mindanao pangunahan ni Police Brigadier General Rolando B. Anduyan, regional director, nga malinawon ang ilang monitoring sa ika 51 nga anibersaryo sa Communist Party of the Philippines-New People's Army (CPP-NPA).
Naka-full alert ang tibuok pwersa sa kapolisan sa maong selebrasyon aron pagpugong sa posibleng pagpangatake sa walhong grupo.
Agi og tubag sa ilang giselebrar sa walhong grupo ang Regional Task Force X to End Local Communist Armed Conflict (RTF X ELCAC) misuporta sa indignation rally concert aron ikondenar ang pagkatukod niini nga grupo ug ingon man ang padayon nga kagubot ug pagpangatake 51 ka tuig na ang milabay.
Ang kanhi mga rebelde nga mibalik na karon sa sabakan sa gobyerno ang nipaabot sa dili maayong mga lihok sa walhong grupo.
Gani sayod ang tanan sa pagpang- ambush nga gihimo gamit ang improvised explosive device (IED) nga miresulta sa kamatayon sa mga sibilyan ug kapolisan.
Padayon sa panawagan ang kapolisan nga dili gyod suportahan ang NPA ug dili magpalinla sa ilang mga dautang propaganda samtang ang mga ginikanan giabisohan nga bantayan ang mga idelohiya sa ilang mga anak.
Nagbarog
Sa laing bahin gipamugos sab sa walhong grupo nga sulod sa 51 ka tuig pabilin sila nga nagbarog ug lig-on.
Kini ang gisulti ni Ka Sandara Sidlakan, ang spokesperson sa Guerilla-Front Committee 21 sa CPP-NPA Northeastern Mindanao Regional Committee atol sa interbyu sa Sun.Star Superbalita sa telepono.
Matud ni Ka Sandara nga simple lamang ang ilang selebrasyon ning tuig lakip niini ang mapasalamaton sa pabiling pagbarog taliwala sa daghang hagit.
Gipaabot niini ang iyang pasalamat sa mga nag-congratulate kanila ug mitawag.
Gibutyag niini nga sila sa NMRC nagrespeto sa paghunong sa gubat karon panahona.
Giklaro sab niini nga kung daw aduna man pagpang-ambush nga gakatigayon posibleng tungod kini kay sila giunhan.
"Aduna man gyud engkwentro kay sagad kami man ang gaunhan," matud niini.