NAHULOG sa kamot sa mga otoridad ang usa ka lalaki nga responsable pagpatay sa iyang pag-umangkon sa Maria Cristina, siyudad sa Iligan.
Mga alas 12:00 sa udto niadtong Disyembre 25, 2019 gisilbi sa kapolisan sa Iligan City Police Station 4 pangunahan ni Police Major Abogado Mautin Jr, uban ang tracker team sa CIDMB ug uban nga mga unit sa kapolisan ang pagsikop sa usa sa wanted sa pagpatay sa siyudad nga giilang si Ferdinand Llaguno, 45, minyo, lumad nga taga Iligan City ug usa ka heavy equiptment operator nakabasi sa Butuan City.
Sa imbestigasyon ang suspetsado naaresto niadtong tuig 2016 tungod sa pagpanggdunggab patay niini sa iyang pag-umangkon.
Apan pagpasabot sa suspek nga igo lamang niya nga gidepensahan ang iyang kaugalingon.
Human kini naaresto niadtong tungora nakapiyansa kini alang sa iyang temporaryong kagawasan apan giingong wala kini nagtunga sa iyang mga court hearings sa pagtuong okay na ang iyang kaso tungod sa iyang piyansa hinungdan ang presiding judge miisyu og warrant of arrest batok niini.
Nanarbaho kini isip backhoe operator didto sa Butuan City sulod sa tulo ka tuig. Dihang mibisita kini sa Iligan aron mamasko gisikop kini sa kapolisan ug karon anaa na nagtingkagol sa prisuhan.