USA ka inahan nagpatabang sa kapolisan aron pagtaho nga gikidnap iyang anak sa kaugalingon nga amahan niini niadtong Disyembre 25, 2019 mga alas 5:30 sa hapon sa Purok-8, Badac, Lala, Lanao del Norte.
Ang bata nga itago sa ngalan nga Nathaniel, 9, residente sa dapit ang giingong gikidnap sa amahan niini nga giilang si Abdullahabdul M. Abdulrahman, 34, minyo, residente sa Marawi City.
Deretsong miresponde ang kapolisan sa pagpanguna ni Police Major Jonan B. Banas, hepe sa Lala Police Station human kini nila nadawat nga repot mga alas 8:15 gikan sa inahan nga mao si Neza Luz, 30.
Giingong kalit lang gidala sa amahan ang bata ug pwersadong gipasakay sa usa ka kolor itom nga toyota Vios nga wala gipananghid sa inahan.
Aduna pay duha ka mga babaye nga sakay sa sakyanan ug gikareport nga padulong sa area sa Marawi.
Ang kapolisan dali nga nag-flash alarm sa mga malabyan nga police station ug saktong pag-abot sa Pantar Police Station nababagan ang sakyanan nga miresulta sa pagkasikop sa tulo ka mga sakay. Narekober ang bata ug nahibalik na karon sa mga kamot sa inahan niini.
Gidayeg sab ni Police Colonel Rene P. Solidarios ang Provincial Director sa Lanao del Norte nipasalamat sa kaabtik sa kapolisan sa pagreponde niini nga insidente.