KASAMTANGAN nga job order sa Barangay Tanke, Dakbayan sa Talisay nasikop sa buy-bust sa Regional Drug Enforcement Unit (RDEU) ug Regional Special Operations Group (RSOG)-7 niadtong Sabado alas 7 sa gabii, Disyembre 28, 2019 sa sityo Tunga.
Si Police Capt. Romeo Caacoy Jr., team leader, niila sa nasikop nga si Regie Racasa, 32, JO sa Barangay Tanke, uban ang laing duha nga sila si Rolando Tabar, 32, drayber ug Erwin Bandolon, 33, drayber sa e-bike. Sila pulos nanagpuyo sa dapit.
Nasakmit gikan kang Racasa ang P50,000 nga balor sa shabu base sa Dangerous Drugs Board (DDB) value.
Sila si Tabar ug Bandolon nasakmitan usab og tagtulo ka mga pakete sa gituohang shabu.
Si Barangay Konsehal Teofilo Daitol niingon nga si Racasa nadestino isip tiglimpyo sa drainage.
“Basin og ang pagkadakop sa inyong tulo tungod kay dunay programa sa Ginuo nga nakaandam kaninyo,” sulti ni Daitol sa tulo nga nadakpan.
Ang Barangay Tanke maoy dunay labing dako nga problema sa illegal drugs sa Dakbayan sa Talisay.
Ang Police Regional Office (PRO) 7 mibutang og mga pulis sa mao nga barangay aron hingpit nga puhagon ang drugas sa dapit.
PUMP BOY
Pump boy sa usa ka gasoline station nakuhaan og P170,000 nga balor sa gituohang shabu atol sa buy-bust operation nga gipahigayon sa kapulisan sa Dakbayan sa Mandaue sa sa alas 2:40 sa kaadlawon sa Dominggo, Disyembre 29, 2019 sa U.N. Ave., Mandaue City.
Si Tristan Jay Tam, 28, taga Pajo, Lapu-Lapu City, pump boy sa usa ka gasolinahan, nasikop sa kapulisan sa Mandaue City Police Office Station 1.
Si Police Major Ramil Morpos, hepe sa Station 1, niingon nga si Tam anaa na sa ilang record, base sa mga taho gikan sa mga dinakpan nila sa una sa Talisay ug Liloan.
Atol sa ilang operasyon, ilang nakompirmar nga nalambigit kini sa ilegal nga drugas. Gani atong higayona gikan kini nakagamit og drugas.
“Mogamit pud kay time nga gidakop among nakita nga high kaayo,” matod ni Morpos.
Dugang ni Morpos nga si Tam igo lang mo-deliver sa mga order ug masuholan og P1,000 kada hatod.
Ang suhol iyang ipalit og shabu aron iya sab nga ibaligya.
Ang suspek anaa na sa kustodiya sa MCPO Station 1 ug moatubang sa kasong kalapasan sa Republic Act 9165 o Comprehensive Dangerous Drugs Act of 2002. (FMD, KFD)