HUMAN sa pag-eskapo sa mga menor gikan sa Operation Second Chance (OSC), ang team sa lima ka mga abogado nagpahigayon og imbestigasyon aron sutaon ang pag-ikyas sa mga bata gikan sa pasilidad.
Kini gihimo human mimando si Cebu City Mayor Edgardo Labella human sa pag-ikyas niadtong Disyembre 22, 2019 sa gabii sa unom ka mga menor, tulo niini ning-surrender.
Ang nahabiling tulo padayon gihapong gipangita sa kapulisan.
Nagsugod ang imbestigasyon niadtong Biyernes, Disyembre 27, 2019, diin lima ka mga opisyal sa pasilidad, apil na si OSC Director Ambrosio Ibones, giimbestigar.
Sigon ni Cebu City Legal Office head Attorney Rey Gealon nga kon mapamatud-an nga adunay kalapasan nga nahimo ang mga opisyal sa OSC, posible nga pasakaan kini og kaso sa pagpasagad sa katungdaan nga anaa sa Civil Service Law (Presidential Decree No. 807) ug sa Code of Conduct (Republic Act No. 6713) ug mahimo ma-dismiss sa ilang mga pwesto.
Nipadala na usab sila og notice ngadto sa lima ka mga opisyal sa pasilidad aron pagpatin-aw sa mga kasaypanan sa seguridad niini.
Niadtong Oktubre karong tuiga, laing 30 ka mga children in conflict with the law (CICL) nisuway pag-ikyas sa OSC, apan ang 10 napugngan sa mga bantay.
Sa 20 nga nakalusot, siyam ang nadakpan dayon samtang laing siyam nitahan.
Duha sa mga nakaikyas pabilin pang mga gawasnon.
Sigon sa mga residente nga naa sa duol sa pasilidad nga sila mahibong ngano adunay makaikyas pa nga gikandadohan man ang gate sa pasilidad.
Ang kasagaran nga irason sa mga CICL nga sila moikyas tungod sa kalaay sa sulod ug anaay uban nga niingon nga sila abusohan sa sulod. (B)