GUMIKAN sa iyang talagsaong determinasyon nga gipakita isip usa ka atleta, ang NBA star player nga si Kawhi Leonard maoy napili sa AP “Male athlete of the Year sa 2019.”
Siya maoy ikalimang NBA player nga nakadawat sa maong prestiyusong pasidungog sunod nila ni Larry Bird (1986), Michael Jordan (1991 ngadto sa 1993), LeBron James (2013, 2016, 2018) ug Stephen Curry (2015).
Ang Associated Press nga maoy mopili kon kinsa ang mohaom sa maong award gilangkuban sa sports editors ug sports beat writers nga mga sakop sa AP. Kini gihimo sa AP sukad pa niadtong 1931.
Si Simone Biles mao usab ang nakadawat sa habig sa kababayen-an sa maong pasidungog. Si Leonard nahimong MVP sa NBA Finals sa duha ka higayon, ug maoy nangulo sa Toronto ngadto sa ilang unang kampiyonato sa NBA.
Lima ka tuig ubos sa San Antonio Spurs diin siya nalakip sa duha ka kampiyonato, siya mibiya sa team ug mibalhin sa Raptors. Karon mitapon na usab siya sa team nga nagbasehan sa iyang yutang natawhan nga mao ang Los Angeles Clippers.
“The ride was fun,” matod ni Leonard sa sayong bahin ning buwana sa dihang mibalik siya sa Toronto isip usa ka sakop na sa Clippers alang sa ilang pagpakigsangka sa Raptors. “I had a great time.”
Sa maong duwa, gisugat siya og makalanog nga pag-abiba gikan sa iyang mga kanhi dumadapig sa Raptors.
Kini maoy bunga sa ilang pasalamat nga natubag ang ilang kauhaw sa kampiyonato sa NBA. (JBM)