GIPAKITA sa Fil-Am nga si Jordan Clarkson kon nganong dili angay ikabasol sa Utah ang pagkuha kaniya pinaagi sa trade human niya matabangi ang Jazz ngadto sa makapakaging nga kaduagan batok sa inilog nga Los Angeles Clippers, 120-107, kagahapon sa National Basketball Association (NBA).
Si Jackson, kinsa nahimong sakop sa Gilas Pilipinas, mitali og 19 puntos sa maong kadaugan nga gipangulohan sa 30 puntos ni Donovan Mitchell.
Nakuha sa Jazz gikan sa Cleveland Cavaliers pinaagi sa trade niadtong Martes, si Clarkson mipuga og pito sa 14 ka itsa gikan sa field goal diin ang Jazz mirehistro og 48.6 porsiyento sa three-point area sa daog nga maoy ilang ikapito sa walo ka duwa.
Si Khawhi Leonard mipugnit og 20 puntos samtang 19 ang nahimo ni Paul George alang sa Clippers kinsa nagpulipuli paghagdaw’g pildi ug daog sa miaging walo ka duwa.
Ang Clippers gikan pa sa impresibong kadaugan batok sa Los Angeles Lakers atol sa adlaw sa Pasko.
Dominado man tuod sa Clippers ang ilawom nga bahin ubos sa pagdumala nila ni Ivica Zubac nga may 15 puntos ug 12 ka rebounds apan ang 11-0 nga rally sa Jazz sa fourth quarter maoy nagpapas sa ilang tinguha.
Sa laing duwa, misandig ang Los Angeles Lakers sa kahait sa opensa ni Kyle Kuzma aron buntogon ang Portland TrailBlazers, 128-120, nga maoy nagputol sa upat nila ka sunodsunod nga kapildihan.
Si Kuzma mikusnit og 24 points, LeBron James midugang og 21 ug 16 ka assists sa maong kadaugan.
“Yeah, I’m just healthy now,” matod ni Kuzma kalabot sa iyang laing impresibong performance.
Mitali usab og 20 puntos si Anthony Davis nga gilamasan og siyam ka rebounds.
Surprisang gidominar sa Toronto Raptors ang Boston Celtics, 113-97, samtang gipakaging usab sa New Orleans ang inilog nga Indiana Pacers, 120-98.
Samtang mipakatap og 44 puntos si James Harden nga gidugangan og 10 ka rebounds ug ang Houston Rockets milaksi sa Brooklyn Nets 108-98.
Na-ejected si Russell Westbrook ug Taurean Prince sa nahabiling 20 segundos sa dihang nagkatinubagay ang duha human gi-foul ni Westbrook si Prince.
Kadto maoy ikalimang daog sa Houston sa uwahing unom nila ka duwa ug ang bugtong nilang pildi mao ang ilang duwa batok sa nangiwit nga Golden State Warriors niadtong adlaw sa Pasko.
Gilubong sa Dallas ang Golden State, 121-141; gibuntog sa Suns ang Kings, 112-110. Saktong dominasyon usab ang gipakita sa San Antonio Spurs batok sa Pistons, 136-109, ug gibaraw sa Milwaukee Bucks ang magic sa Orlando, 111-100.
Gitangtangan og tango sa Cavaliers ang Timberwolves, 94-88, ug gisungay sa Chicago Bulls ang Atlanta Hawks, 116-81.
Ang Knicks mitamaktamak usab sa Wizards, 107-100. (JBM)