ADUNAY dakong atraksyon nga mapuno sa Sinulog 2020 nga ipahigayon sa South Road Properties.
Kini ang Regatta o Baruto festival ug musical fireworks display nga ipahigayon sa Enero 17.
Gilauman nga ang mao nga mga kalingawan modani pa og dugang mga turista sa Dakbayan sa Sugbo.
Si Konsehal Jerry Guardo, kinsa maoy gitahasan sa pag-organisar sa habig sa Dakbayan, nagkanayon nga mahitabo ang lumba sa baruto sa Enero 17 sa buntag.
Isunod ang drag race kun lumba sa mga motorsiklo ug nianang pagkagabii, mao na ang fireworks competition nga pangulohan sa Cebu Dragon.
Si Guardo nagkanayon nga molanat og duha ka oras ang musical fireworks display.
Lakip sa moapil mao ang mga entrante sa Manila kansang pabuto manukad gikan sa dagat atbang sa Il Corso.
Dugang ni Guardo nga adunay mga kalingawan nga pagahimuon, lakip na nga motukar mao ang mga sikat nga banda sa nasod.
Dugang ni Guardo nga kon magmalampuson ang kalihukan, himuon na nila kining matag tuig nga atraksyon sa Sinulog.
Si David Odilao Jr, founder sa Sinulog ug Atty. Jose Daluz III., SRP manager, maoy nagtambayayong aron mahimo ang kalingawan.
Si Guardo nangita og nga paagi para makumpleto ang tanang mga gikinahanglan. (PAC)