UPAT ka mga barangay gikan sa duha ka mga lungsod sa amihanang Sugbo ang nakabenepisyo sa “Operation Tabang” sa Cebu City Government niadtong Sabado, Disyembre 28, human sila gikusokuso sa bagyong Ursula.
Si Mayor Edgardo Labella maoy nangulo sa distribution kauban ang mga department head, employees ug mga miyembro sa Walk and Talk Friendship Club kinsa maoy niapud-apod sa relief goods.
Lakip sa mga barangay nga natabangan mao ang Poblacion, Maya ug Tapilon sa lungsod sa Daanbantayan ug Poblacion sa lungsod sa Medellin nga personal nga gidawat ni Mayor Benjun Mondigo.
Ang duha ka mga lungsod maoy grabeng naapektuhan sa bagyo.
Labing minos 6,000 ka mga balay ang hingpit nga naguba samtang labing minos 12,000 ang nakaangkon og danyos.
Sa kinatibuk-an, niabot og 300 ka galvanized iron, 200 ka sakong bugas, 2,000 ka mga trapal, 2,000 ka 1 liter bottled water, 195 ka box nga tubig, 400 ka putos nga sliced bread nga gikarga sa duha ka dumptruck ug 6x6 truck.
Ang mayor giubanan ni City Administrator Floro Casas Jr, City Attorney Rey Gealon, City Accountant Jerome Ornopia, DSWS head Dr. Jeffrey Ibones, Disaster Chief Harold Alcontin ug Sim Romarate.
Ang Walk and Talk nga gipangulohan ni Atty. Frank Malilong ug Atty. Alex Monteclar nagtampo-tampo para maka-donate og housing materials ug ubang relief goods.
Si Labella kinsa nakighinabi sa mga biktima ug lider sa barangay ug mismo ni Mondigo, nipasabot nga di pa maka-donate og cash assistance ang Siyudad sanglit nagkinahanglan pa kini og pagtugot sa konseho.
Ang mayor nidugang nga wa siya magduhaduha og tabang sa mga taga Medellin ug Daanbantayan sanglit sila usab mga Sugbuanon.
Niadtong Nobiyembre, naghatod usab og hinabang sa Mindanao ang Siyudad sa mga naigo sa mga linog. (PAC)