WA GISALIKWAY sa direktor sa Cebu Police Provincial Office (CPPO) nga posibleng’ adunay mga tawo sa Siyudad sa Talisay ang mang-recruit aron mosalmot sa New People’s Army (NPA).
Mga batan-on sagad ang punterya sa recruitment hinungdan nga usa ang Talisay City sa gitutokan sa CPPO.
Si Police Colonel Roderick Mariano, direktor sa CPPO, maoy nangulo sa indignation rally sa Talisay City.
Sa dekada 80, ang Talisay usa sa mga dapit sa Metro Cebu nga gihugpaan sa mga rebeldeng NPA.
Ang indignation rally batok sa NPA gihimo sa nagkadaiya nga ahensya sa gobyerno niadtong Huwebes, Disyembre 26, diin kasagaran pinanguluhan sa mga pulis.
Matod ni Mariano nga mas gipahugtan pa nila ang kampanya batok sa mga rebelde hinungdan nga subsob ang ilang pagbisita sa mga lugar diin daghan ang mga batan-on sama sa mga tunghaan.
“May nahuli tayo na NPA last August sa Negros Oriental. Tapos sila na rin ang nagsabi na dito sa Talisay sila nag-rerecruit,” asoy ni Mariano.
Giangkon niya nga kasagaran nga madani sa grupo mao ang batan-on kansang panghuna-huna mga linghud pa ug daling mapatuo.
Hinungdan nga niawhag usab si Mariano sa mga ginikanan nga diha pa lang sa ilang panimay giyahan na nila daan ang ilang mga anak sa mga maayong gimbuhaton.
Bisan pa man nga nideklarar og ceasefire tali sa kasundaluhan ug mga grupo sa mga rebelde, way kompyansa ug alerto sila sa kapulisan ingon man paghingusog sa ilang intelligence monitoring aron ang kapugngan ang pagpang-recruit.
Samtang, dul-an sa usa 100 ka mga tawo ningsalmot sa gilusad sa kapulisan sa Dakbayan sa Sugbo nga indignation rally gikan sa Fuente Osmeña rotunda paingon sa kampo sa Cebu City Police Office (CCPO).
Ang indignation rally sa tibuok nasod gipasiugdahan sa kapulisan, militar ug Department of the Interior and Local Government.
Nagmartsa sila gikan sa Fuente Osmeña paingon sa kampo sa CCPO dala ang dagkong banner nga nagkondinar sa mga kalihukan sa mga teroristang grupo.
Matod ni Police Lieutenant Colonel Clark Arriola, information officer sa CCPO, bisan wala kaayo maapektuhi ang dakbayan sa mga pagpangatake sa mga terorista miduyog sila sa sentimento sa ubang lugar sa Central Visayas nga gihamok sa mga rebelde. (FDM, AYB)