Genoguin: Salamat 2019, welcome 2020

DUHA nalang ka adlaw ang nagpabilin niining tuig 2019, ug pipila nalang ka oras ang atong paabuton mosulod na ang tuig 2020. Matag usa kanato, magpangutana kon unsa kahay nagpaabot sa unahan sulod niining mosunod nga 12 ka bulan nga maoy molangkob sa tuig sa 2020.

Matag usa kanato, adunay damgo sa kinabuhi nga gustong magma-uswagon ang atong adlaw-adlaw nga panginabuhi nga wala nato hikaplagi niining tuiga ug mahimong atong mapalgan sa sunod tuig.

Pero ang problema, tungod kay dili kita ang magbuot sa atong kapalaran, kay kon kita palang, dili kita gusto’g magkalisud lisud sa atong panginabuhi kay atong gusto kinabuhing haruhay.

Daghan ang mga panghitabo niining tuiga nga dili gyud nato mahimong hikalimtan, ang sunod-sunod nga linog nga dunay mga mahal nato sa kinabuhi nga nawad-an og panginabuhian, kapuy-an ug mitaliwan, nga bisan kita wala magtuo nga dili sila makaabot sa Pasko, pero subo palandungon nga niining paskoha duna kita’y pagpangandam nga ato silang ika-uban, apan kalit lang silang nawala sa atong kiliran.

Atong namatikdan sa atong kulturang Pilipino nga kanunay natong handumon ang mga mapait nga kaagi o kasinatian sa atong kinabuhi.

Sama pananglit sa nahitabong pagpanomba sa Davao International Airport niadtong Marso 6, 2003, ug sa pagpamomba sa pantalan sa Sasa niadtong Abril 3, 2003 nga daghang inosenteng mga igsuon nato ang namatay, kada tuig atong ginahandom sa pag-adto sa maong dapit.

Pero wala kita’y mahimo kay ato na kining kultura, sa ubang mga nasud sama sa nga walay sam-ang o sementeryo kansa ginasunog ang lawas sa tawo human mamatay, giwala ug gipapas na nila sa ilang alimpatakan ug dili na handumon, ug duna pa’y laing nasud nga adunay sementeryo pero wala na nila duawa ang mga lubong sa ilang mga mahal sa kinabuhi, ngano? Sagabal sa ilang adlaw nga pagpaningkamot.

Pero kita, gawas nga aduna kita’y kalag-kalag matag bulan sa Nobyembre, ato gyung handumon ang kasumaran sa kamatayon sa atong mga paryente, wala kita’y mahimo tungod kay maoy atong kultura.

Ang pinakasakit nga kasinatian mao ang wa nato damha nga wala na nato sila gikauban niining paskoha, ug ang mga nabiktima intawon sa linog ug ni Bagyong Ursula, mahimong pait nga handumanan niining tuig 2019.

Mga kaigsuonan ko sa Davao del Sur, partikular na sa lungsod sa Magsaysay, Matanao, Hagonoy ug Padada mibati kami sa inyong kasub-anan niining paskoha inay nga maglipay, apan wa kita’y mahimo kay dili kita ang nagbuot sa panahon tingali ang uban kaninyo wanay pagsalig sa atong gamhanang Diyos kung nganong giingon kita niya niini, apan, ayaw kalimot diha sa atong gigamit sa pag-ampo ug pangagi-on nga “Matuman ang imong pgbuot dinhi sa yuta maingon man sa langit.”

Bisan og unsa pa’y atong nahiagoman ning tuiga, pasalamatan nato Siya sa tanan. Salamat 2019 ug welcome 2020, hinaut unta nga wala na’y mga katalagman nga among mahiagoman niining umaabot nga Bag-ong Tuig.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph