KIDAPAWAN CITY -- Andam na ang tanan nga mga pribado og pampubliko nga hospital sa North Cotabato sa pagsugat sa Bag-ong Tuig.
Anaa na sa Code White Alert ang Department of Health (DOH)-Davao ug Integrated Provincial Health Office (IPHO)-Cotabato bisan ang mga Municipal Health Offices sa abtik nga paglihok niini sa mga posibleng biktima sa pabuto ug maigo sa stray bullet.
Giseguro sa mga balay tambalanan sa North Cotabato nga 100 porsyento na silang andam sa pagsugat sa New Year.
Sa pagdeklara og Code White Alert, wala gitugutan nga empleyado ilabina mga doktor nga mo-absent sa trabaho, mag-leave o kaha magbakasyon ilabina kadtong anaa nadestino sa mga emergency rooms.
Dunay mga augmentation employees sab ang direkta nga magresponde kung dunay mga dagkong hitabo.
Nanghinaot ang DOH nga moubos ang ihap sa mga mabuthan sa pabuto (firecrackers) gumikan sa mando ni Presidente Rodrigo Duterte nga nagdili sa paggamit og mga dagkong pabuto sa pagsugat sa Bag-ong Tuig.
Gitahasan sab ang pamunoan sa kapulisan nga kompiskahon ug dakpon kadtong namaligya og mga firecrackers nga gidili sa gobyerno.
Nanawagan si Dr. Eva Rabaya, IPHO-Cotabato chief, sa katawhan sa probinsiya sa Cotabato nga likayan ang paggamit og pabuto sa pagsugat sa Bag-ong Tuig aron malikayan ang disgrasiya. Edgar E. Fuerzas