KIDAPAWAN CITY -- Tungod sa sunod-sunod nga linog sa North Cotabato ug sa Davao del Sur, nakita nga daw hinay-hinay sab nga nanglugsong gikan sa bukid ang mga rebeldeng New People's Army (NPA) padung sa patag.
Gikataho nga ang mga rebelde mihimulos sab sa mga tabang nga gipaabot sa gobyerno sa mga biktima sa linog, gumikan ang mga NPA sa bukid biktima sab nga maoy usa sa mga hinungdan nga nagkahinay na ang puwersa sa NPA sa probinsiya sa Cotabato ug Davao del Sur.
Kini ang gikomperma ni Lieutenant Colonel Rhodjun Rosales, commanding officer sa 39th Infantry Battalion Philippine Army.
Mao usab kini ang resulta sa padayon nga paglutos sa militar sa mga NPA, maayo nga programa sa gobyerno sa kabukiran ug pagbalik sa sabakan sa balaod sa mga rebelde.
Nanguna sab ang mga NPA nga misurender sa militar sa simultaneous indignation rally sa nagkadaiyang dapit sa Soccsksargen ug gikondena niini ang mga hiwing binuhatan sa mga komunistang pundok.
Kahinumduman nga nagdeklara og persona non grata ang Provincial Government sa North Cotabato batok sa mga NPA.
Gikondena sab sa mga molupyo sa mga hilit nga dapit sa probinsiya sa Cotabato ang grabeng pagpangayo og revolutionary tax sa NPA nga daw gitulis na ang mga sibilyan ilabina ang mga mag-uuma.
Nanawagan si Rosales sa mga NPA nga wala pa mahigmata sa hiwi ug walay pulos nilang gipakigbisugan nga musurender na og sila tabangan sa gobyerno nga manginabuhing magmalinawon uban ang ilang mga mahal nga pamilya.