MAY labot sa negusyo ug pagtaktak og trabahante ang duha ka mga motibo nga gisubay karon sa kapulisan sa pagpatay sa usa ka veterinarian nga negusyante.

Nitumaw kini sa pasiunang imbestigasyon sa Talisay City Police Station labot sa pag-ambush patay kang Dr. Neil Bogao, 48, doktor sa kahayupan ug negusyante og karneng baboy, mga ala 1:45 sa kaadlawon sa Lunes, Disyembre 30, 2019.

Nahitabo ang pagpamanhig kang Boligao samtang siya sakay sa iyang puti nga pick-up nga sakyanan, gikan sa slaughterhouse sa Sitio Maanyag, Barangay Biasong, Siyudad sa Talisay.

Matod ni Police Lieutenant Ralph Celosia, deputy chief sa Talisay City Police Station nga duha ka mga lalake nga naka-full-faced helmet ug naka-jacket ang luwan sa black and white nga motorsiklo ang nipusil-patay kang Boligao.

Giingon nga alas 8 pa Dominggo sa gabii, Disyembre 29, nakit-an si Boligao nga nisulod sa ihawan ug niana lang pasado ala 1 sa kaadlawon nigawas.

Ang lugar patungas ug giingon nga ang mga mamumuno nibabag gamit ang motorsiklo ug ang backride ang nipusil sa windshield sa driver’s side sa makadaghang mga higayon.

Human sa hitabo, yano ra usab nga nakasibat ang mga killer.

Nakuha sa crime scene ang upat ka mga basiyo sa mga bala sa .45 kalibre nga pistola.

Mga samad pinusilan sa dughan ang naangkon ni Boligao hinungdan sa kamatayon niini.

Motibo

Matod ni Celosia nga duha ka mga anggulo ang ilang gitutokan sa ilang pakisusi sa kremin.

Una, ang propesyon niini nga pagka-freelance nga veterinarian ug ang pagkanegusyante.

“Sa among initial nga inbestigasyon, either sa business, livestock partnership, o sa iyang profession as vet. Gikan siya sa slaughter house, mao iyang trabaho kada gabii, mag-check na siya, kay sa ato nasuta nga mohatag na siya og clearance sa mga ihawon nga baboy,” saysay ni Celosia.

Ilang susihon ang pasiunang taho nga dunay kasungian sa negusyo ang doktor ug giingong duna usab siyay gitaktak nga trabahante bag-o pa.

Giklaro usab ni Roldan Supatan, focal person sa Talisay City Livestock and Poultry Center sa ihawan, nga di konektado sa gobyerno si Boligao.

Apan usa kini sa mo-issue og vet health certificate, paghatag og pagtugot nga ang usa ka baboy o baka mamahimo nga mapaihaw sa slaughterhouse sa Siyudad sa Talisay.

Dugang ni Supatan nga magkanunayan si Boligao sa ihawan kay adunay mga hayupan nga ipaihaw, kansang mga karne ipanghatud ug ipangbaligya sa merkado sa Carbon, Dakbayan sa Sugbo.

“Dili siya connected sa gobyerno dire sa ihawan sa dakbayan sa Talisay. Pero regular na siya moari kay naa na siyay negusyo nga magpaihaw og baboy nga ihatud sa Carbon public market. Mo-issue usab kini og vet health authority but as private vet na. Necessary sa mga pag-ihaw dire sa amo ang vet health certificate, usa siya sa authorized nga mopirma kay licensed man siya,” pasabot ni Supatan.

Gisubay pa usab ngadto sa pamilya ug higala ni Boligao kon nakahisgot na ba daan ang biktima og death threat.

Samtang nagpakisusi usab ang kapulisan kon adunay closed-circuit television camera sa dapit o sa duol nga nahitabuan aron pagsuta ug pag-ila sa mga mamumuno.