SUPERBALITA CEBU

LBJ mitala na’g 9,000 ka assists

SI LEBRON James mao na karon ang ikasiyam nga player sa kasaysayan sa NBA nga aduna nay 9,000 ka assists sa dihang gileksiyon sa Los Angeles Lakers ang Dallas Mavericks, 108-95, Lunes sa buntag sa Pilipinas.

Ang four-time most valuable player awardee kinsa nag 35 anyos na niadtong Lunes, mipakatap sa iyang ika-9,000 nga assist sa katapusang 4:35 segundos nga nahabilin sa first quarter pinaagi sa iyang outlet pass ngadto ni Anthony Davis kinsa yano ra kaayong nakahansak.

Kadto maoy iyang ika-13 nga assists sa maong duwa diin siya mitapos usab nga may 13 puntos. Si Davis mikolekta og 23 puntos ug 19 usab ang natampo ni Kentavious Caldwell-Pope nga naglakip sa tulo ka tres.

Ang higanting si Dwight Howard adunay 15 puntos, tanan napupo sa second quarter.

Perming naglabaw ang Lakers. Human sa 35-31 nga labaw sa second quarter, ang 12-2 nga rally maoy nag-inat sa ilang bintaha ug wala na gayud kini mobahar sa ilang opensa ug depensa.

Si Luka Doncic nangulo sa Dallas nga may 19 puntos apan hingutas kining nakaduwa human makaposte sa iyang ika-siyam nga triple-double sa niaging nilang duwa.

Mitan-aw sa panagsangka nga nakahatag og dugang kaikag ni James mao si Kobe Bryant. Human sa duwa, si Doncic milamano kang Kobe.

Sa kadaugan, ang Lakers nga nakaangkon og upat ka sunodsunod nga kapildihan sa wala pa ang ilang duha ka uwahing daog, mipahugot sa ilang liderato sa Western Conference nga may 26-7 samtang ang Dallas anaa sa ikalimang luna nga may 21-11 nga record.

Samtang mipuawan og 27 puntos si Lonzo Ball nga may pito ka tres ug gipahagsa sa New Orleans Pelicans ang Houston Rockets, 127-112 alang sa ilang ikaupat nga nagkutay nga kadaugan.

Midugang og 25 si E’Twaun Moore nga gibuwakan usab og lima ka tres. Hinuon ang Houston misulod sa korte nga wala ang ilang tulo ka sinaligan nga sila si James Harden, Russel Westbrook ug Clint Capela.

Sa laing mga duwa, giunay pagtipi sa Canadian nga si Shai Gilgeous-Alexander ang Toronto Raptors sa dihang iyang gipangulohan ang Oklahoma City Thunder ngadto sa 98-97 nga kadaugan didto sa Toronto.

Atubangan sa iyang kataganasod, si Gilgeous-Alexander mihipos og 32 puntos, lakip na ang syat nga nakapadaog niini, samtang midugang usab og 25 si Chris Paul nga may 11 ka rebounds ug walo ka assists alang sa Thunder.

“It feels good but all of it, honestly, wouldn’t have meant anything if we didn’t win,” matod ni Gilgeous-Alexander. “That was the best feeling, knowing that we came out of here with a win.”

Gitukob sa Memphies Grizzlies ang Hornets, 117-104, ug gikuhaan sa Nuggets og korona ang Kings, 120-115. (JBM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph