ANG dominasyon sa Southwestern University-Phinma (SWU) Cobras sa local basketball maoy nag-unang kasaysayan sa natad sa paugnat sa kusog dinhi sa Sugbo sa tuig 2019.
Sulod sa duha ka tuig nga pag-amuma ni coach Mike Reyes uban sa iyang mga bag-o ug batan-ong hinugpong nga mga Cobras, ilang napakita ang kahanas sulod sa korte sa dihang ilang gilangkatan ug gipakgang ang dominanting University of the Visayas (UV) Green Lancers sa regular season sa Cebu Schools Athletic Foundation, Inc. (Cesafi) men’s basketball.
Nagsugod pagsubang ang kaamag sa Cobras sa paghiabot ni Lamine Thiam, ang import nga gihulagway ni Reyes nga “hulog ng langit.”
“Actually, wala sa amin yung pagkuha ni Lamine. Hindi namin siya kilala. Gusto man namin na may import, pero wala kaming budget. So, ginawa ko just keep on training the guys. Two years of sacrifices, at saka mga bata pa, eh,” matod ni Reyes sa dihang gikahinabi sa “Isports ta Bai, Live” sa FB page sa Superbalita.
Si Reyes nahimong headcoach sa SWU Cobras human miluwat si coach Raul “Yayoy” Alcoseba niadtong 2013.
Ang makapasurprisa nga pagluwat ni Alcoseba nagagumikan sa iyang tinguha nga mahatagan og igong pagtagad ang iyang political career.
Midagan man tuod og pipila ka mga katuigan hangtod nga naumol ni Reyes ang iyang mga bag-o ug linghod nga ma recruits.
Bisan tuod og positibo sa iyang mga panglantaw sa team, dihay panahon nga nakapangutana si Reyes sa iyang kaugalingon kon haom ba ang iyang sistema.
“I almost gave up the system. Sometimes sinabi ko sa sarili ko, do I have to change the system?. Pero I never did that. I have to be patience with the young guys.”
Kini nagagumikan kay Cobras, ubos sa iyang pagdumala, wala makapakita og saktong labok. Apan sa hinayhinay mihulma ang kausaban sa dihang miabot si Lamine.
“A friend in Manila, nagkontak sa akin nga may foreigner daw siya na gustong maglaro. At first tinanggihan ko kasi wala talaga kaming enough budget for import. Pero sabi naman, na hindi daw problema ang budget, gusto lang maglaro,” dugang saysay sa beteranong coach nga igsuon ni kanhi Gilas Pilipinas coach Chot Reyes.
Tungod sa maong gipadayag, si Reyes misugot apan gipaagi una niya og tryout.
“Sinabi ko na, o sige pero tryout muna siya, bago kami magdesisyon. Tingnan namin yung laro niya,” sumpay ni Reyes.
Tuod man, iyang nakita nga bisan og may gitas-on, ang dinuwaan ni Lamine anaa sa guard nga position nga sukwahi sa ubang import nga sa ilawom ang duwa.
Apan nakita usab ni coach Reyes nga haom sa iyang sistema si Lamine ug hinungdan nga wa siya magpanagana sa paglakip niini sa iyang lineup.
“Lamine is playing at the backcourt, pero nakita mo, he is effective in guarding the center. Parang versatile player,” ni Reyes pa.
Unang timailhan nga anaa sa saktong timplada ang Cobras mao ang ilang paglangkat sa Partner’s Cup sa Cesafi nga mao usab ang unang higayon nga anaa kanila si Lamine.
Ang presensiya ni Lamine nakahatag usab og igong determinasyon ug enerhiya sa mga local nga gipangulohan nila ni Shaquille Imperial, Red Cachuella ug Dyll Roncal.
Kon unsa ang ilang gibuhat sa Partner’s Cup mao usab kini ang ilang gipakitang paglabok sa Cesafi regular season diin ilang gilupig sa best-of-three finals ang three-peat champions UV Lancers, 2-1.
Di pa igo, sila usab ang midominar sa tinuig nga Minglanilla Mayor’s Cup Inter-collegiate basketball championships.
Gikan niadto, ang Cobras nakakulit nag balik og pangalan sa basketball hinungdan nga nakadawat na kini og mga imbitasyon gikan sa nagkalainlaing rehiyon.
“Yung mga laro namin sa labas, maliban sa malaking exposure sa team, we’ll make it also as part of our recruitment. Pag may nakita kami na potential na interesado, we give him a chance.”
Sayod si Reyes nga daghan sa iyang mga key players ang mawala na sa sunod season sa Cesafi, apan wala kini niya ikabalaka.
Adunay mga mosaka gikan sa development program sa iyang grass roots level ug labaw sa tanan “the system continues with our new breed of players,” panapos ni Reyes. (JBM)