BUG-AT nga tahas ang gipas-an karon sa bag-ong hepe sa Cebu City Police Office (CCPO) sa iyang pag-asumir sa katungdanan isip lider sa kapulisan sa Dakbayan sa Sugbo.
Si Mayor Edgardo Labella gusto nga mapatuman ug makab-ot ang “zero injury o casualty” sa mga Sugbuanon labot sa pabuto sa nagsingabot nga Bag-ong Tuig.
Ang hagit gidawat ni Police Colonel Englebert Soriano, kinsa bag-ong pangulo sa CCPO, human siya gitudlo ni Police Brigadier General Val de Leon, hepe sa Police Regional Office (PRO7), isip officer-in-charge.
Niadtong Dominggo, Disyembre 29, si Soriano ug mga opisyal sa Dakbayan sa Sugbo kauban nilang Raquel Bohol-Arce, Konsehal Phillip Zafra , City Administrator Floro Casas Jr., City Attorney Rey Gealon ug Market Administrator Jonil Matuguina ninglibot sa Carbon Market diin kaniadto adunay mga baligy nga pabuto.
Wa silay nakit-an, apan gipadayag ni Soriano nga gi-activate na niya ang mga intelligence personnel sa CCPO aron mo-monitor sa mga illegal nga nagbaligya og pabuto.
Kon duna silay madakpan, ilang bilangguon.
Ipakapatap niya ang iyang mga sakop karong adlawa, Disyembre 31, sa mga dapit nga daghang malls.
“We will confiscate all firecracker traders outside the designated selling areas including malls,” matod ni Soriano.
Ang City Government nigahin og luna habig sa South Road Properties duol sa dalan Vestil para makatinda ang mga firecracker vendor.
Gimanduan ni Labella si Soriano nga kinahanglan nga way magpabuto sa iyang dul-an 1,000 ka mga sakop sa Bag-ong Tuig aron malikayan ang maangol o mamatay gumikan sa saag nga bala.
Gusto sa mayor nga tanggalon kini sa katungdanan.
“ Masama po ang kapupuntahan ng personnel natin na ma-involved sa indiscriminate firing,” bahad ni Soriano sa iyang sakop nga magpabuto.
Gawas niini, gusto ni Labella nga masumpo ni Soriano ang giingong korapsyon sa kwerpo sa kapulisan.
Ipadayon niya ang nasugdan ni kanhi CCPO chief ug karon general manager sa Philippine Charity Sweepstakes Office (PCSO) Royina Garma nga mao ang paglutos sa mga druglord ug drug pushers.
Gusto usab sa mayor nga maminosan ang mga krimen sa dakbayan sa Sugbo pinaagi sa pagpalapad sa presensiya sa kapulisan sa kadalanan. (PAC, AYB. PAC & AYB)