KALIPAY ug kagul-anan? Dunay pahalipay ang National Wages and Productivity Commission (NPWC) sa mga mamumuo ig-abli sa Tuig 2020. Matud pa sa taho, sa Enero 5, 2020 ipatuman na ang bag-ong sweldohan sa mga nanarbaho sa Central Visayas. Ang nanarbaho sa gitawag nga Class A cities ug munisipyo sama sa dakbayan sa Sugbo modawat na og sweldo nga P404 matag adlaw.
Ang kadtong nanarbaho sa gitawag nga agricultural sector ang usbaw sa sweldo P26 nga moabot na sa P394 and sweldo matag adlaw gikan sa P368. Mas dako ang usbaw sa mga obrador sa agriculture kay sa mga nanarbaho sa paktorya o tindahan kay P18 ra ang ilang usbaw.
Ang nasakop sa Class A cities dinhi sa Sugbo mao ang dakbayan sa Cebu, Mandaue, Lapu-Lapu, Danao, Talisay, ug Carcar. Ang Class A nga mga lungsod mao ang Compostela, Consolacion, Cordova, Liloan, Minglanillan ug San Fernando.
Ang nasakop sa Class B cities mao ang Bogo ug Toledo, Cebu; Bais Bayawan, Canlaon Dumaguete,Guihulngan ug Tanjay, Negros Oriental ug uban niini ang mga lungsod na. Ang usbaw sa sweldo sa Class B P28 gikan sa P18 o P366 na matag adlaw. Ang kadtong mga establisamento nga 10 ra ang empleyado P361 ang sweldo matag adlaw.
Niadtong Dec. 21, 2019 gipublikar sa mga mantalaan ang Wage Order ROVII-22 sa Central Visayas ug kini mahimo na nga ipatuman 15 ka adlaw gikan sa pagpublikar. Ang pangutana, andam na ba ang mga nagdumala sa kompaniya nga nahimutang sa Class A cities ug lungsod sa Central Visayas sa sweldo nga P404 matag adlaw?
Maayo ni nga balita sa atong mga kaigsuonan nga nanarbaho sa mga paktorya ug mga tindahan, gamay o dako, nga naa sulod sa mga dagko nga mall. Apan ang epekto sa bag-o nga usbaw sa sweldo sa mga mamumuo dili maayo sa tanan tungod kay mosaka man usab ang presyo sa mga palaliton. Sa ato pa mobanda ra gihapon natong tanan.
Ang mogawas nga luoy aning bag-o nga usbaw sa sweldo sa mga trabahador mao ang mga retirado na nga nagsalig lang sa ilang retirement benefits tungod kay di man sila apil sa usbaw. Tungod kay ang mga negosyante di man paalkanse sa ilang kita ug ginansya, natural lang nga ilang pasakaan usab ang presyo sa ilang produkto.
Samtang malipay ta, labina sa mga mamumuo, nga dunay usbaw sa sweldo apan duna sad tay bation nga kahingawa tungod sa epekto niini sa presyo sa mga palaliton lakip na ang pletehan sa sakyanan nga depasaheroan sama sa barko ug ayroplano. Kita ra nga mga konsumidor ang mogawas nga luoy aning bag-o nga usbaw sa sweldo.
Bisan pa sa mga kalamidad nga atong nasugatan sa Tuig 2019, atong sugaton ang Tuig 2020 sa usa ka malipayon ug mahigugmaon nga selebrasyon. Happy New Year!
•••
PAHALIPAY. Akong pahalipay sa akong pag-umangkon nga si Maris Climaco-Bontuyan nga gikasal niadtong Sabado ni Archie Canillo didto sa San Isidro Labrado parish. Si Maris ang nag-inusara nga anak babaye ni Vivian Climaco ug nianhing Nereo Bontuyan. Manghinaut mi Maris ug Archie nga inyong ipadayon ang inyong nasugdan nga maayo kaayo nga relasyon.