KARONG Enero 5, 2020 magsugod na og epekto ang mga umento sa minimum nga mga suholan sa Central Visayas nga giaprobahan na sa Regional Tripartite Wages and Productivity Board (RTWPB). Lainlain ang umento kay nag-agad kini sa lugar ug gidak-on sa personnel sa establisemento o patigayon.
Samtang daghan ang nangalipay nga yanong mga mamumuo, dunay pipila nga sa sekretong nagpakahilom, giagwanta ang ilang pagkabiktima sa unfair labor practice. Daghan pa ang mga mamumuo nga nag-antos sa ubos sa minimum nga suholan.
Kini nga mga mamumuo nagpakahilom ug nag-antos tungod kay mahadlok sila nga moreklamo kay mawad-an sila og panginabuhian. Kon sila moreklamo sa Department of Labor and Employment (Dole), hayan masirhan ang kompaniya. Alang nila ang P200 mas maayo na lang kay sa zero.
Sagad usab sa wa makaangkon aning minimum nga mga suholan mao ang yanong mga mamumuo sa gagmay nga mga establisemento. Kini ang open secret sa labor sector. Naay ubang mga kompaniya nga duha ka payrolls ang gipirmahan – ang tinuod nga sweldo ug ang saktong minimum apan minamao-mao.
Bisan tuod kon gihingusgan sa kagamhanan ang kampanya batok sa malapasong mga negusyante, daghan sa mga hingtungdan o biktima ang pabilin nagpakahilom kay lagi, mas maayo ang naay income kay sa wala. Naa pay uban nga way Social Security System (SSS) ug Pag-ibig.
Apan kon ang usa ka negusyante kahibawo pang mobati sa iyang mamumuo, di niya lapason ang balaud kay ang gihatag nga minimum nga suholan, pahaum usab sa unsay ekonomikanhong kahimtang sa usa ka lugar. Apil na niini ang galastuhan sa pagkaon, balay, pagpuyo ug uban pa.
Unsaon man sab gud ning ubang mga negusyante, medyo hakog ra nga makigbahin sa kita sa iyang negusyo. Mahadlok nga makuhaan ang ilang dako nga ginansya.