SUPERBALITA DAVAO

Roldan: Barberong panagna sa 2020

Nota Bene

KATAPUSANG adlaw sa tuig 2019 karon. Malipayong Bag-ong Tuig sa tanan. Manghinaut kami nga mas mabungahon ang inyong kinabuhi sa 2020.

Sa pagkatinuod lisod makalimtan ang 2019 ilabi na dinhi sa Mindanao kay gitay-og kita og mga kusog nga linog sugod sa Oktubre 16. Niadtong Dominggo, nagpadala kami og ayuda sa biktima sa Padada, Davao del Sur ang “epicenter” sa 6.9 magnitude nga linog niadtong Disyembre 15, 2019.

Imbis magpahigayon pa’g “Alumni Homecoming” sa Disyembre 30 nanghatag na lang hinuon og “relief goods” sa mga biktima. Gibalhin ang petsa sa “homecoming” sa Mayo 21, 2020 sa pagtuo nga wala nay katagman nga moabot nianang adlawa.

Apan kung pangutan-on nato ang mga biktima sa linog, nabalaka kaayo sila sa umaabot. Hangtod karon, nagpadayon ang “aftershocks” sa nagkadaiyang lugar sa Southern Mindanao.

Pangutana nila nga basin may “the big one” pa? Apan unsay mga panagna sa umaabot? Ang mga iladong eksperto ug mananagna sa kalibutan aduna nay mga pagbasa sa umaabot. Ang halos tanan kanila nag-ingon nga mograbe pa ang kalamidad sa kalibutan nga gitawag nila og “climate crisis”.

Magpadayon sab ang giyera batok terorismo, giyera sa Israel batok sa Palestina, ug ginagmay’ng bangi sa mga nasud. Mahimong “super power” ang China, magsugod ang planong pagpadako sa armadong pwersa sa Japan, sulayan pagkuha’g balik sa China ang Taiwan ug pag-angkon sa mga isla sa West Philippine Sea, samtang magpadayon ang pagtiurok ang ekonomiya ug pulitika sa United States of America.

Matangtang kuno si Presidente Trump sa pwesto pinaagi sa “impeachment” sama sa nahitabo ni President Erap Estrada ug magpadayon ang buruka sa Republicans ug Democrats.

Sa laing bahin, kung maminaw kita sa nga estorya sa barberohan daghan kitang masagap nga panagna sa panghitabo sa atong nasud. Ang negatibong panagna kay ang pagpadayon sa kalamidad sa nasud, gikan sa linog hangtod sa bagyo ug baha.

Ang mga linog sinugdanan daw sa pagmata sa Mt. Apo apan dugay pa kining moulbo sama sa nahitabo sa Mt. Pinatubo. Tungod sa “climate crisis” adunay mga isla sa nasud nga maunlod o sanapan og tubig sa panahon sa “high tide” ug bagyo.

Sa pulitika, magpadayon ang bangi tali sa administrasyon ni PRRD ug ang dilawang Liberal Party. Magsanib pwersa ang pro-PRRD ug grupong misuporta sa pederalismo aron madayon ang pag-usab sa sistemang pulitikal o kaha iduso ang “revolutionary government” ubos sa usa ka “civilian-military junta.”

Mosugod usab ang paglihok sa “Sara for President Movement-2022” (SPM-2022) aron ipadayon ang wa mahuman nga proyekto sa iyang amahan ilabi na ang “Build, Build, Build Program” ug hinabing pangkalinaw, pagwagtang sa kurapsyon, way labot niini ang programang “tokhang” ug mabangis nga “war-on-drugs.”

Ang positibong panagna mao ang padayong pagsaka sa “trust-rating” sa pangulo ug sa iyang administrasyon. Apil ang pagkunhod sa kapobrehon ug walay trabaho ug ang subling pagbalik sa hinabing pangkalinaw sa Communist Party of the Philippines-New People’s Army (CPP-NPA) ug sa gobyerno sa Pilipinas.

Mahingpit usab ang kamugnaan sa Bangsamoro Autonomous Region for Muslim Mindanao. Ang bantayan lang mao ang pagsabotahe niini sa mga “Muslim-extremists” ug ang lakang sa Central Intelligence Agency sa pagpapatay sa pangulo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph