M’LANG, North Cotabato -- Mainitong gisugat ni North Cotabato Governor Nancy Catamco ug Mayor Russel Abonado ang pamuno sa nasud atol sa pag-abot niini sa M’lang National High School covered court Lunes sa buntag, Disyembre 30, 2019.
Mismong si Presidente Rodrigo Duterte ang mitunol sa hinabang nga tseke ngadto sa mga mayor sa probinsya sa North Cotabato nga naigo sa upat ka mga kusog nga linog.
Kini maoy ayudang pinansyal nga ipangapod-apod sa mga pamilyang biktima sa linog.
Aduna sab mga food packs nga ilang madawat gikan sa Department of Social Welfare and Development (DSWD).
Gisaksihan sa kapin kun kulang 500 ka mga indibidwal lakip mga opisyal sa gobyerno ang maong programa.
Human dinhi, gilayong milupad ang pamuno sa nasud padung sa siyudad sa Digos aron motambong sa ika-60 nga founding anniversary sa Cor Jesu Collge (CJC), ang tunghaan niya sa sekondarya kaniadto.
Dako ang pasalamat ni CJC president Bro. Ellakim Sosmeña sa pagtando sa Presidente sa ilang imbitasyon.
Mitunol sab si Duterte sa kantidad P10-milyones nga tseke isip tabang sa mga biktima sa linog sa Davao del Sur. (Orlando B. Dinoy)