DATU MONTAWAL -- Usa ka sako sa gituohang pinaugang dahon sa marijuana ang narekober sa mga tanaman og bulak alas 110 sa buntag niadtong adlaw nga Dominggo, Disyembre 29, 2019 didto sa probinsiya sa Maguindanao.
Sumala kang Maguindanao Police Provincial director Colonel Arnold Santiago nga nagpahigayon og operasyon ang hiniusang puwersa sa Datu Montawal Municipal Police Station, 4th MP MAGPPO, Alpha Company sa 7th Infantry Battalion, Philippine Army ug Bangsamoro Islamic Armed Forces (BIAF) sa 129th Base Command sa Moro Islamic Liberation Front (MILF) sa utlanan nga parte sa Barangay Dalgan Pagalungan ug Barangay Dungguan Datu Montawal sa Maguindanao.
Apan, nakaipsot ang mga tawo nga nagpayuhot sa gidiling druga nga punting sa operasyon.
Narekober sa militar, kapulisan ug MILF ang usa ka sako nga gibilin ug gitago sa mga suspetsado sa mga tanaman og bulak.
Ang local government unit (LGU)-Datu Montawal, militar, kapulisan ug MILF ang nag-alayon batok sa mga tawo o grupo nga nalambigit sa illegal drug trade.
Gikanayon ni Datu Montawal Mayor Datu Otho Montawal nga walay luna sa ilang dapit ang gidiling druga ug angayan lamang patyon ang mga nalambigit niini.
Sa kasamtangan, gipalig-on pa sa militar, kapulisan, MILF ug LGU-Datu Montawal ang war on drugs ni Presidente Rodrigo Duterte sa Datu Montawal sa Maguindanao. (Edgar Fuerzas)