MIDSAYAP, North Cotabato -- Nailog sa awtoridad ang mga tag-as nga matang sa mga armas sa mga armadong grupo alas 12:15 sa udto didto sa probinsiya sa Cotabato.
Gibutyag ni 602nd Brigade commander Brigadier General Robert Capulong nga nakadawat sila og impormasyon sa mga armas nga gitago sa mga miyembro sa Bangsamoro Islamic Freedom Fighters (BIFF) sa Barangay Nabalawag, Midsayap, Cotabato.
Abtik nga nagresponde ang mga sakop sa 34th Infantry Battalion, Philippine Army ug Midsayap Municipal Police Station.
Apan, wala pa makaabot ang mga sundalo ug mga pulis sa balay nga gitagoan sa mga terorista sa Barangay Nabalawag, Midsayap, miikyas na kini paingon sa hilit nga dapit.
Narekober sa awtoridad ang duha ka M16 Armalite rifles, usa ka M14 rifle, mga magazine, bandoleers ug mga bala.
Gikanayon ni Midsayap Chief of Police Lieutenant Colonel Miredel Calinga ug 34th IB Commander Lieutenant Colonel Gleen Loreto Caballero nga dugay na nila nga gipanid-an ang grupo sa BIFF nga mitabok gikan sa Maguindanao.
Nagpasalamat sab si 6th Infantry Division Chief Major General Diosdado Carreon sa mga sibilyan nga nagpaabot og impormasyon sa militar ug kapulisan sa presensya sa mga dautang pundok.
Sa kasamtangan, gipalig-on pa sa militar ug kapulisan sa Midsayap, Cotabato ang pagbantay sa posibleng surpresa nga pagpangatake sa BIFF ilabina sa pagsugat sa Bag-ong Tuig. (Edgar E. Fuerzas)