NAANGKON sa pambato sa lungsod sa Opol ang Best in Swimsuit Competition nga gipahigayon niadtong adlaw’ng Biyernes, Disyembre 27, sa Lohas Hotel, lungsod sa Laguindingan, Misamis Oriental.
Si Isobel Teano maoy niharbat sa titulo nga Best in Swimsuit kon diin pagadawaton niini ang iyang P5,000 nga premyo didto na sa Coronation night sa El Salvador City Gymnasium sa petsa 9 sa Enero subay sa Kuyamis festivities.
Pasok sa Top 5 mao sila si Miss Talisayan, Sheena Balansag; Miss Alubijid, Veronica Yvette Valdez; Miss Lugait, Esel Ponce; ug Miss Gingoog City, Pauline Feranil.
Matud sa mananaog nga si Teano nga wala kini niya gidahom.
“I really didn’t expect this. I just really did my best and I just go with the flow and everything happen for a reason. I am so thankful that it has to be me. I am so overwhelmed,” kini ang malipayon nga pahayag ni Teano sa SuperBalita.
Dugang niini nga motivation niya ang iyang inahan, pamilya ug mga Opolanons nga anaa nilantaw ug nisuporta sa iyang pagsalmot sa kompetisyon.
Gibutyag sab ni Provincial Tourism Department Head abogado Jeffrey Saclot nga well deserved ang kadaogan ni Teano sa swimsuit.
Gipasigarbo sab niini nga ubay-ubay nga benipisyo ang makuha sa mananaog sa Miss Kuyamis tungod kay ila kining suportahan ug libre ang tanan kung mosalmot sa mga national nga kompetisyon kini tungod sa pagdala og garbo ug honor sa lalawigan.
Alang sab kang Misamis Oriental Governor Bambi Emano gibutyag niini atol sa iyang mensahe nga alang kaniya mananaog na ang tanan nga mga kandidata gumikan sa pagrepresenta sa ilang tagsa tagsa ka lungsod.
“The judges will having a hard time because I believed that the 21 lovely candidates deserves to win representing the municipalities of Misamis Oriental,” matud ni Emano.