NILANDING sa balay tambalanan ang 23 anyos nga ulitawo human giluba sa kanhi katrabaho ra usab niini mga alas 8:20 sa gabii niadtong Huwebes, Disyembre 26, sa Quezon Avenue Extension, Barangay Pala-o, Iligan City.
Giila ang biktima nga si John Michael D. Apalia, 23, kanhi construction worker apan kasamtangan nag-aplay og pagka sundalo.
Sa inisyal nga imbestigasyon, nasuta nga kining biktima nagbaklay sa dapit apan ang gitumbok niini nga kanhi katrabaho nga giilang si Jemar Ando, 42, ang kalit midoul kaniya.
Nangutana pa kini kaniya kung asa kini nagtrabaho ug gitubag sa biktima nga mo-aplay siya og trabaho.
Sa walay igong rason, kalit niining giluba si Apalia hinungdan sa pagkaigo sa iyang tiyan nga bahin. Dali dayon nga misibat ang suspetsado.
Ang biktima nakalakaw pa ug nakapangayo og tabang hinungdan dali kining gidala sa balay tambalanan sa dapit.
Sa follow-up investigation nga gihimo sa kapulisan, gituohang naalaan lamang kining biktima tungod kay ang suspek adunay kaaway nga katrabaho gihapon niini nga John Rey ang pangalan.
Gilusad na sa kapulisan ang hot pursuit operation batok sa suspetsado karong panahona.