PAKYAS pagpalusot sa ilegal nga druga ang duha ka mga dalaw human kini nasapon nga gipaslak sa pancit canton atol sa pagbisita mga ala 1:15 sa hapon niadtong Disyembre 27 sa Misamis Oriental Provincial Jail (MOPJ), Barangay 27, dakbayan sa Cagayan de Oro.
Sikop sila si Jay-are Lumiares, 22, ug Merchan Sabunod, 18, pulos residente sa Poblacion 3, Villanueva, Misamis Oriental.
Sa nahipos nga impormasiyon gikan sa Police Station 2 (PS2) sa Cogon, ang bisitahon sa mga dinakpan mao ang priso nga si Ronel Bantog alyas Bonso.
Gikabutyag nga nasikop ang duha human ilang gitagoan ang duha ka mga pakete sa gituohang shabu ug laing usa ka gamay nga pakete sulod sa pancit canton atol sa pagrekisa ug pag-inspeksiyon sa assistant jail warden nga si Maricris Mulat.
Sa pagsulat niini nga balita Lunes, nagtingkagol sa mini-cell sa PS2 ang nahisgutang mga dinakpan.