M’LANG, North Cotabato -- Giaghat ni Presidente Rodrigo Duterte si Department of Interior and Local Government (DILG) Secretary Eduardo Año nga huptan ang Philippine National Police (PNP) sa musunod nga duha ka tuig o hangtud nga silang duha mukanaog sa puwesto.
Kini ang giluhatan sa Presidente sa iyang pagbisita sa mga biktima sa linog sa M’lang, North Cotabato niadtong Lunes, Disyembre 30.
Direkta nga gisulti sa Pangulo kang Año nga tarungon ang pamunoan sa kapulisan una sila mukanaog sa puwesto aron dili na kaayo bug-at ang problema sa mga Pilipino.
Bag-o niini nagsumite si Año sa pangulo og listahan sa mga nauyunan niya nga musunod nga mangulo sa kapulisan human miluwat sa puwesto si kanhi PNP chief Oscar Albayalde gumikan sa isyu sa ninja cops.
Kahinumdoman nga kapila na ka higayon nga gisulti sa presidente nga wala pa siya'y gihinganlan nga bag-ong hepe sa kapulisan gumikan nangita pa siya og matinud-anon nga mangulo niini.
Nagbahad si Presidente Duterte nga i-take-over niya ang pamunoan sa PNP.
Wala pa'y tubag si Año sa hangyo ni Duterte og igo lang siyang mipahiyom atol nga sila nag-uban sa pagpanghatag og hinabang sa mga biktima sa linog sa North Cotabato.
Sa kasamtangan, gipamunoan ni Police Lieutenant General Archie Francisco Gamboa ang PNP isip officer-in-charge.