YANONG kadaugan maoy gituldok ni Joseph Mercado sa tuig 2019 human niya paundanga ang Sugboanong pioneering mixed martial arts warrior nga si Edmund Vergara sa main event sa Cebu Fighting Championship - “The Wait” niadtong Lunes sa gabii, Disyembre 30, 2019, sa Sports Complex sa barangay Buanoy, lungsod sa Balamban.
Si Mercado, lumad nga taga Coron, Palawan, apan ubos sa pagdumala sa Yaw-Yan Ardigma Cebu, daling nakahimo sa rear-naked-choke nga maoy nakapapugos ni Vergara sa pagsumiter sa iyang kaugaling sulod lang sa 46 segundos.
“Alam kong may kakayahan siya, kaya maski maaga pa, ayaw ko na siyang bigyang tsans. Baga matsambahan pa tayo,” matod ni Mercado kinsa misaka sa ring nga dakong inilog.
Ang kadaugan maoy hinayhinay nga naghatag kaniya og ang-ang nga matuman ang iyang damgo nga makaaway sa ONE Championship.
Tungod usab sa iyang gipakita, si Ardigma Cebu founder Master Benigno “Ekin” Caniga mibutyag sa Sun.Star Cebu nga iya karong gihikay nga malakip si Mercado sa ONE Hero Series.
Nanghinaot usab si Caniga nga si Mercado malakip sa mga fighters nga makapakita og aksyon sa MMA grassroots series nga mosugod sa Pilipinas sa tuig 2020.
Samtang sa Muay Thai main event, gipildi ni Renan “Flash” Noblefranca si Tonix Borres pinaagi sa split decision.
Sikit ang maong panagkombati, apan ang kombinasyon sa patid ug kumo ni Torrefranca sa second round maoy naghulma sa iyang kadaugan aron siya makabangon gikan sa kapildihan sa sayong bahin ning buwana.
Kadto maoy unang away niBorres sa Muay Thai human sa boxing, MMA ug jiu-jitsu.
Sa MMA undercard, gipasurender ni Nino Rio Saoy si Mark Antholene Balaba sa ground sa second round, gi-knockout out ni Christian Tabunag si Alsharidz Damlani sa opening round.
Gipukan usab ni Harodl Tabalino pinaagi sa tap out si Mark Otida, gipildi ni Bethovin Quijano si Ruben Amoin. Dali ra usab nga gipahurar ni Albert Garnica si Arnel Regodon sa round one.
Ang ubang midaog sa Muay Thai mao sila si Michael Rebayos batok ni Laurence Bendijito (decision), Jason Marangga mipaundang ni Edgar Huete sa one round, Ramon Gabriel delos Reyes miparetiro ni Laurence Lee Ramirez, midaog usab si Kim Bisbal batok ni Isaac Torres pinaagi sa first round stoppage.
Midaong si Emmanuel Aron Plaza ug Ken Caburnay pinaagi sa referee stop the contest sa second round human tinagsa nilang gibuntog sila si Denmark Comaingking ug Mark Dono.
Gilupig ni Jether Pio Jr. sa pinuntosay si Edgar Caburnay Jr. (JBM, EKA)