Boxing yearender: Kalampusan ug kapakyasan mihamok sa mga inilang local boxers sa Sugbo

KALAMPUSAN ug kapakyasan maoy misungog sa natad sa boxing sa Sugbo sa tuig 2019.

Kini tungod kay pipila ka mga Sugboanong boksingero o mga boksidor nga nagagikan sa laing dapit apan ania na magbasehan sa Sugbo ang mikutlo og mga kalampusan sa ilang tagsatagsa ka karera, apan dili usab nato malilong ang mga kapakyasan nga naangkon sa pipila kanila.

Si Johnriel Casimero, lumad nga taga Ormoc City, apan dinhi sa Sugbo nabaid ang iyang talento, maoy nakatagamtan sa matam-is nga kalampusan taliwala sa kontrobersiya nga mihamok kaniya.

Komplikasyon sa mga managerial contract sa managlahing kampo nga misangko sa legal issue maoy mihudlat sa iyang boxing career.

Apan human sa mga unos nga mihapak sa dalan nga iyang giagi-an, si Casimero nahitugpa sa kampo ni Manny Pacquiao nga maoy nahimong dalan nga migiya kaniya ngadto sa laing nga kalampusan.

Disyembre 1, 2019, gipakaging ni Casimero ang kalibutan sa boxing sa dihang iyang gi-knockout ug gilangkatan sa WBO bantamweight title ang inilog nga si South African Zolanie Tete didto sa Birmingham Arena sa England.

Kaduha gyud tumbaha sa 30-anyos nga Casimero ang hometown favorite sa third round nga maoy nakapaaghat ni referee Steve Gray sa pag-undang sa away. Ang oras 2:14 sa maong round.

Miuli ang kanhi IBF light-flyweight ug flyweight champion nga Casimero (29-4, 20KOs), nga sa makausa pa, dala ang bakus sa pagka world champion ug dungog sa nasod nga gipresentar ngadto sa yutang Pilipinhon.

Tungod sa maong kalampusan, siya maoy ikaupat sa nasod nga sa kasamtangan naghupot og world title sunod nilang legendary Manny Pacquiao, IBF superflweight king Jerwin Ancajas, ug IBF minimumweight king Pedro Taduran.

Apan sukwahi sa naangkon ni Casimero, kapakyasan ang nasinati ni Dave Penalosa human kini miyukbo sa kalantip sa South African nga si Lerato Dlamini sa ilang World Boxing Council (WBC) silver featherweight title fight niadtong Hulyo 13 ning tuiga didto sa Jeddah, Saudi Arabia pinaagi sa unanimous decision.

Kadto maoy unang kapildihan sa 28 nga Penalosa, pag-umangkon ni kanhi world champion Gerry Penalosa, sulod sa iyang 16 ka away. Siya adunay 16 ka knockouts.

Disyembre 21, adlaw Sabado dinhi sa Pilipinas, nakurat ang mga Sugboanon human midahunog ang balita nga ang kanhi wala pay pildi ug gilantaw nga usa sa mga world boxing prospect sa Sugbo nga si Jhack Tepora, napildi sa usa ka round sa kontra nga wa na gani makaaway sulod sa 15 ka buwan.

Nalup-og ang 24-anyos nga Tepora nga naigo sa body shots ni Oscar Escandon sa nahabiling 1:30 sa unang hugna sa ilang 10-round non-title featherweight fight nga maoy nag-mansa sa iyang baraha.

Giplano karon sa kampo ni Tepora (23-1, 17 KOs), kinsa sama kang Casimero ubos na usab sa MP Promotions ni Pacquiao, ang rematch batok ni Escandon (25-5, 18 KOs) nga posibling mahitabo sa 2020.

Sa kasamtangan, si Tepora ania sa Sugbo uban sa iyang asawa nga si Dinah, alang sa hamubong bakasyon ug pagsugat sa bag-ong tuig.

Sa pag-intrada ning tuig 2020, sa samang higayon, napanglantawan usab nga adunay unom ka mga Pinoy boxers nga mao karon ang top contender o mandatory challenger sa ilang tagsatagsa ka division.

Duha niini mao ang Cebu-based nga sila si Albert Pagara ug Melvin Jerusalem nga pulos sakop sa Ala Boxing Gym.

Si Pagara (32-1) maoy naghupot sa World Boxing Organization (WBO) No. 1 superbantamweight division samtang si Jerusalem (15-2) ang WBC No. 1 sa minimumweight.

Lab-as pa sa iyang 1st round knockout nga kadaugan batok sa Thailander nga si Ratchanon Sawangsoda niadtong Agusto 17, si Pagara, 25, aduna nay katungod nga mosuway paglangkat sa world title nga gihuptan ni Emanuel Navarrete.

Samtang si Jerusalem, sa iyang bahin, mao usab ang mandatory challenger sa Thailander nga si Wanheng Menayothin sa Thailand.

Niadtong 2017, si Jerusalem misuway og langkat sa titulo ni Wanheng ug nakahatag og saktong kombati.

Kon dili pa tungod sa one-point deduction nga gipahamtang ngadto ni Jerusalem, hayan matabla unta ang away.

Si Wanheng, 34, naghupot og record nga pinakadaghan og daog nga wala pay pildi sa mga world champions, 54-0, nga mas labaw pa sa nahimo ni Floyd Mayweather Jr.

Ang ubang mga mandatory Pinoy challengers ma sila si Nonito Donaire Jr., WBC No. 1 bantamweight; Michael Dasmarinas, IBF No. 1 bantamweight; Giemel Magrama, WBO No. 1 flyweight ug Robert Paradero, WBO No. 1 minimumweight. (JBM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph