SI FATIMA Lumabao, 50, lumad sa Marawi City.
Aron paglikay sa kagubot sa dapit atol sa panag-engkwentro tali sa kasundaluhan ug mga teroristang sakop sa Maute group, nianhi siya sa Sugbo.
Apan wa siya magdahom nga dinhi diay sa Dakbayan sa Sugbo iyang masugamakan ang aksidente nga nikutlo sa iyang kinabuhi.
Alas 3 sa Martes sa hapon, Disyembre 31, namatay si Lumabao.
Nianang buntag, siya nabanggaan sa usa ka armored van sa dan Colon, eskina Osmeña Boulevard, Siyudad sa Sugbo pasado alas 9 sa buntag.
Si Police Major Joemar Pomarejos, hepe sa Waterfront Police Station nga nahinabi sa Superbalita Cebu, niingon nga si Lumabao nitabok sa dan.
Hayan wa siya makabantay sa nagdulong nga armored van hinungdan nga siya nadasmagan.
Grabe ang kadaut sa iyang ulo human siya mapasok ilawom sa van.
Ang drayber sa van kasamtangan na nga gibalhug sa Waterfront Police giila ni Pomarejos nga si Ricardo Hernando, 37, taga Englis V. Rama, Barangay Guadalupe, Siyudad sa Sugbo.
Matod ni Hernando sa kapulisan nga hinay lang ang iyang dagan.
Pag-abot sa lugar, wa siya makabantay sa pagkabangga kang Lumabao.
Diha lang siya nakahibawo human siya gisinggitan sa nagpakabana nga mga tawo.
Ang igsuon ni Lumabao nga atoa pa sa Mindanao mipahibawo sa imbestigador sa insidente nga ang biktimay nagbinugtong lang nga nagpuyo sa dakbayan sa Sugbo aron paglikay sa kasamok sa Dakbayan sa Marawi.
Nagtuo lang sila nga toa sa Metro Manila kay maoy pananghid. (BBT)