MOABOT na sa P1.150 million nga balor sa mga illegal nga pabuto nasakmit sa kapulisan sa Siyudad sa Sugbo atol sa ilang hugot nga kampanya batok sa Oplan Iwas Paputok sa Department of Health (DOH) ug Philippine National Police (PNP).
Si Police Colonel Engelbert Soriano, bag-ong nilingkod nga officer-in-charge sa Cebu City Police Office (CCPO), nagkanayon nga ang mga pabuto nga ilang nabawi mao kadtong gipamaligya sa di designated fire cracker zone diin didto ra unta gitugotan nga makabaligya sa ilang mga pabuto.
Ang uban niini gipangtago ug gibutang sa luyo sa mga duwaan sa dagkong mga tindahan sa Carbon public market.
“Yung mga confiscations namin, nakatago talaga karamihan. Ang nasa front nyan mga toys, mga torotot mga ganun. Pero behind that, may mga boxes silang nakukuha. I’m sure, mas marami pang nakatago kay sa nakita namin,” matod ni Soriano.
Pasakaan og kasong may kalapasan sa Firecracker Regulations Act kon aduna na silay madakpan, apan sa pagkakaron wa pa silay nadakpan gawas lang una sa pagsakmit sa mga illegal nga pabuto.
Tinguha sa CCPO ug Police Regional Office 7 nga zero injuries atol sa pag sugat sa Bag-ong Tuig.
Kon di mapugngan, labing maayo nga mokunhod og 50 porsiento.
Ila usab nga gipangsusi ang fireworks nga gipang display sa mga mall sa Dakbayan sa Sugbo.
Nasuta hinuon ni Soriano nga adunay permit ang maong mga kompaniya.
Si Police Brigadier General Ildebrandi Usana, deputy regional director for administration sa PRO 7, nagkanayon nga posibling mosaka pa ang gidaghanon sa nakuhang illegal nga mga pabuto sa tibuok rehiyon.
Sanglit sa kapin usa ka milyon nga balor sa pabuto nga nakuha sa dakbayan sa Sugbo lamang kini, wa pa maihap ang sa mga silingang siyudad sa Metro Cebu.
Seguridad
Hugot nga siguridad ang gipatuman sa kapulisan sa tibuok Central Visayas aron way mogamit sa armas sa pagpabuto.
Awhag ni Usana sa gunholders nga responsable lang unta sila sa ilang mga armas nga kon kini mo buto adunay nag ungaw nga kinabuhi sa inosenteng tawo nga nag saulog sa Bag-ong Tuig.
“Sa mga firearms holders, we also advice them not to make use on their firearms for purposes lang na magsaya dahil ito po ay mag ko-cause lang ng trouble sa ating mga mamayan, lalo na kung ang trajectory ng kanilang armas ay pataas,” datod ni Usana.
Gimandoan usab ang mga police sa probinsya nga magbantay sa posibling pag atake sa mga rebeldeng komunista bisan kon adunay ceasefire sa gobyerno.
Gisumbong
Tungod sa sumbong sa mga batan-ong Talisaynon, moabot sa dul-an 2,000 ka mga kahon sa illegal nga mga pabuto ang nasakmit sa Talisay City Police Station atol sa saturation drive batok illegal firecrackers.
Kini tanan diha nakuha sa managlahi nga mga lugar sa Barangay Tabunok, Dakbayan sa Talisay atol sa unom ka mga saturation drive.
Kauban sa TCPS ang Regional Public Safety Batallion (RPSB-7), kinsa nihimo sa unom ka mga operasyon gikan sa alas 4 sa hapon hangtud sa alas 5:30 Lunes sa hapon, Disyembre 30.
Matod ni Police Major Gerard Ace Pelare, hepe sa Talisay, nga mapasalamaton kaayo sila sa mga pulis ngadto sa nagpakabana nga mga batan-on.